അമ്മയെ അച്ഛന്‍ എന്നും ഉപദ്രവിക്കാറുണ്ട്’: അജിഷയുടെ മരണത്തില്‍ മക്കളുടെ മൊഴി

പാലക്കാട് പറളിയില്‍ ഭര്‍തൃവീട്ടില്‍ യുവതിയെ തൂങ്ങിമരിച്ച നിലയില്‍ കണ്ടെത്തിയ സംഭവത്തില്‍ ഭര്‍ത്താവിനെതിരെ ബന്ധുക്കളും മക്കളും പരാതി നല്‍കി. ധോണി കല്ലംപറമ്പ് സ്വദേശിനി അജിഷയുടെ മരണത്തിലാണ് സര്‍ക്കാര്‍ ഉദ്യോഗസ്ഥനായ ഭര്‍ത്താവ് പ്രമോദിനെതിരെ ആരോപണം. മദ്യപിച്ചെത്തി പ്രമോദ് നിരന്തരം പീഡിപ്പിച്ചിരുന്നതായി അജിഷയുടെ മക്കള്‍ ബന്ധുക്കളോട് പറഞ്ഞ ഓഡിയോ മങ്കര പൊലീസിന് ലഭിച്ചു. മദ്യപിച്ചെത്തുന്ന അച്ഛന്‍ അമ്മയെ മര്‍ദിക്കുന്നുവെന്ന് കുട്ടികള്‍ പറഞ്ഞു. പ്രമോദ് മദ്യപിച്ചെത്തുന്നത് അജിഷ ചോദ്യം ചെയ്യുന്നതായിരുന്നു ആക്രമണ കാരണം. 12 വര്‍ഷം മുന്‍പായിരുന്നു അജിഷയുടെയും പ്രമോദിന്റെയും വിവാഹം. രണ്ട് ആണ്‍കുട്ടികളും അമ്മയെ ഉപദ്രവിക്കുന്നത് പല തവണ നേരില്‍ക്കണ്ടിട്ടുണ്ടെന്നാണ് മൊഴി. കരിമ്പ പഞ്ചായത്തിലെ യുഡി ക്ലര്‍ക്കാണ് പ്രമോദ്. നേരത്തെയും നിരവധി തവണ അജിഷയെ ഭര്‍ത്താവ് പീഡിപ്പിച്ചിരുന്നതായി സഹോദരന്‍ അജീഷ് പറഞ്ഞു. പോസ്റ്റ്‌മോര്‍ട്ടത്തിന് ശേഷം അജിഷയുടെ മൃതദേഹം ബന്ധുക്കള്‍ക്ക് കൈമാറി. കുട്ടികളുടെ ഉള്‍പ്പെടെ വിശദമായ മൊഴിയെടുത്ത് തുടര്‍നടപടി സ്വീകരിക്കുമെന്ന് പൊലീസ് അറിയിച്ചു.