ലാന്‍ഡിങ്ങിനിടെ ഒഎന്‍ജിസി ഹെലികോപ്റ്റര്‍ അറബിക്കടലില്‍ വീണു; 4 മരണം

ഏഴ് ഉദ്യോഗസ്ഥരും 2 പൈലറ്റുമാരുമായി പുറപ്പെട്ട ഓയില്‍ ആന്‍ഡ് നാച്ചുറല്‍ ഗ്യാസ് കോര്‍പറേഷന്റെ (ഒഎന്‍ജിസി) ഹെലികോപ്റ്റര്‍ ലാന്‍ഡിങ് നടത്താനുള്ള ശ്രമത്തിനിടെ അറബിക്കടലില്‍ വീണു. ഒഎന്‍ജിസി ഉദ്യോഗസ്ഥരായ മൂന്നു പേരടക്കം നാലു പേര്‍ മരിച്ചു. ജുഹുവിലെ ഹെലിപ്പാഡില്‍ നിന്ന് മുംബൈ ഹൈയിലെ സാഗര്‍ കിരണ്‍ എന്ന റിഗ്ഗിലേക്ക് പുറപ്പെട്ട ഹെലികോപ്റ്ററാണ് തകര്‍ന്നുവീണത്. 9 േപരെയും രക്ഷപ്പെടുത്തി എന്നാണ് നേരത്തേ തീരസുരക്ഷാ സേന അറിയിച്ചിരുന്നത്. ആശുപത്രിയിലെത്തിച്ച വേളയില്‍ നാലു പേരുടെ മരണം സ്ഥിരീകരിക്കുകയായിരുന്നുവെന്ന് ഒഎന്‍ജിസി അധികൃതര്‍ പറഞ്ഞു. അടിയന്തര ലാന്‍ഡിങിന് കാരണമായ സാഹചര്യം വ്യക്തമായിട്ടില്ല. ഹെലികോപ്റ്ററിനോട് ചേര്‍ന്ന് ഘടിപ്പിച്ചിരിക്കുന്ന ഫ്‌ളോട്ടേഴ്‌സ് ഉപയോഗിച്ച് ലാന്‍ഡ് ചെയ്യാനുള്ള ശ്രമം പരാജയപ്പെടുകയായിരുന്നു. റിഗ്ഗിലെ ലാന്‍ഡിങ് മേഖലയില്‍ നിന്ന് ഒന്നര കിലോമീറ്റര്‍ അകലെയാണ് കടലില്‍ വീണത്.