കെട്ടിട നമ്പര്‍ ക്രമക്കേട്; കോഴിക്കോട് കോര്‍പ്പറേഷനിലെ കൗണ്‍സിലില്‍ വന്‍ പ്രതിഷേധം, ബോര്‍ഡും മൈക്കും നശിപ്പിച്ചു

കോഴിക്കോട്: കോര്‍പ്പറേഷനിലെ കെട്ടിട നമ്പര്‍ ക്രമക്കേടുമായി ബന്ധപ്പെട്ട് കൗണ്‍സില്‍ യോഗത്തില്‍ വന്‍ പ്രതിഷേധം. കെട്ടിട നമ്പര്‍ ക്രമക്കേടില്‍ സെക്രട്ടറിയെ മാറ്റിനിര്‍ത്തി അന്വേഷണം നടത്തണമെന്നാവശ്യപ്പെട്ട് യുഡിഎഫ് കൊണ്ടുവന്ന അടിയന്തരപ്രമേയം ചര്‍ച്ചചെയ്യാന്‍ കോഴിക്കോട് മേയര്‍ ഡോ. ബീന ഫിലിപ്പ് വിസമ്മതിച്ചതാണ് പ്രതിഷേധത്തിന് കാരണം. ക്രമക്കേടില്‍ നാല് തലത്തില്‍ അന്വേഷണം നടക്കുന്നുണ്ടെന്നും സുതാര്യമായാണ് അന്വേഷണം നടക്കുന്നതെന്നും മേയര്‍ പറഞ്ഞു. മറുപടിയില്‍ തൃപ്തരാകാതെ യുഡിഎഫ് - ബിജെപി അംഗങ്ങള്‍ മേയറുടെ കസേരക്കടുത്തേക്ക് മുദ്രാവാക്യം വിളിയുമായി എത്തുകയായിരുന്നു. സംഘര്‍ഷത്തില്‍ മൈക്കിന് കേടുപാട് സംഭവിക്കുകയും ചെയ്തു. കൗണ്‍സില്‍ യോഗം പെട്ടെന്ന് പിരിഞ്ഞ് മേയറെ എല്‍ഡിഎഫ് അംഗങ്ങളും സുരക്ഷാ ഉദ്യോഗസ്ഥരും ചേര്‍ന്ന് ഓഫിസിലെത്തിച്ചു. അവിടെയും പ്രതിഷേധമുയര്‍ന്നു. മേയറുടെ ബോര്‍ഡ് തകര്‍ത്തതോടെ ബിജെപി കൗണ്‍സിലര്‍ ശിവപ്രസാദിനെ പോലീസ് കസ്റ്റഡിയിലെടുക്കുകയും തുടര്‍ന്ന് അറസ്റ്റ് രേഖപ്പെടുത്തുകയും ചെയ്തു. പ്രതിഷേധത്തിനിടെ പോലീസും എല്‍ഡിഎഫ് അംഗങ്ങളും ചേര്‍ന്ന് മേയറെ പുറത്തെത്തിച്ചു. സംഭവത്തില്‍ പൊതുമുതല്‍ നശിപ്പിക്കല്‍ നിരോധ നിയമപ്രകാരം കോര്‍പ്പറേഷന്‍ പരാതി നല്‍കിയിട്ടുണ്ട്.