പിസി ജോര്‍ജ് പീഡിപ്പിക്കാന്‍ ശ്രമിച്ചത് ഫെബ്രുവരി 10 ന് 404 ാം നമ്പര്‍ റൂമിലെന്ന് പരാതിക്കാരി

തിരുവനന്തപുരം ; സോളര്‍ പീഡനക്കേസിലെ പരാതിക്കാരി നല്‍കിയ മറ്റൊരു പീഡന പരാതിയില്‍ പൂഞ്ഞാര്‍ മുന്‍ എംഎല്‍എ പി.സി.ജോര്‍ജിനെ മ്യൂസിയം പൊലീസ് അറസ്റ്റ് ചെയ്തു. സ്വപ്ന സുരേഷിന്റെ വെളിപ്പെടുത്തലുമായി ബന്ധപ്പെട്ട ഗൂഢാലോചന കേസില്‍ ചോദ്യം ചെയ്യാന്‍ തൈക്കാട് ഗെസ്റ്റ് ഹൗസിലെത്തിയ ജോര്‍ജിനെതിരെ ഇന്നു രാവിലെയാണ് സോളര്‍ കേസിലെ പ്രതി പരാതി നല്‍കിയത്. കഴിഞ്ഞ ഫെബ്രുവരി 10 ന് തൈക്കാട് ഗെസ്റ്റ് ഹൗസിലെത്തിയ തന്നെ പീഡിപ്പിക്കാന്‍ ശ്രമിച്ചുവെന്നാണ് പരാതിക്കാരി പറഞ്ഞിരിക്കുന്നത്. .404ാം നമ്പര്‍ റൂമിലാണ് പീഡനശ്രമം നടന്നതെന്നും അന്ന് കടന്ന് പിടിച്ചുവെന്നും ഇവരുടെ പരാതിയിലുണ്ട്. ഐപിസി 354, 354 എ എന്നീ ജാമ്യമില്ലാ വകുപ്പുകള്‍ ചുമത്തിയാണ് അറസ്റ്റ്. ഗൂഢാലോചന കേസില്‍ ചോദ്യം ചെയ്യുന്നതിനിടെയാണ് ഇത്തരത്തില്‍ പീഡനപരാതിയുള്ള വിവരം പി.സി.ജോര്‍ജിനെ അറിയിക്കുന്നത്. പിന്നീട് തൈക്കാട് ഗെസ്റ്റ് ഹൗസില്‍ എത്തിച്ചശേഷം പൊലീസ് അറസ്റ്റ് രേഖപ്പെടുത്തുകയായിരുന്നു. ഇതിനുശേഷം പി.സി.ജോര്‍ജിനെ എആര്‍ ക്യാംപിലേക്കു കൊണ്ടുപോയി.