കൃത്യമായി നികുതി അടച്ചു; മഞ്ജു വാര്യര്‍ക്ക് കേന്ദ്ര സര്‍ക്കാര്‍ അംഗീകാരം

കൃത്യമായി നികുതി അടച്ചതിന് നടി മഞ്ജു വാര്യര്‍ക്ക് കേന്ദ്ര സര്‍ക്കാര്‍ അംഗീകാരം.ജിഎസ്ടി നികുതികള്‍ കൃത്യമായി ഫയല്‍ ചെയ്യുകയും അടയ്ക്കുകയും ചെയ്തതിനാണ് നടിയും നിര്‍മാതാവുമായ മഞ്ജു വാര്യരെ തേടി കേന്ദ്ര സര്‍ക്കാര്‍ അംഗീകാരം എത്തിയത്. കേന്ദ്ര ധനകാര്യ മന്ത്രാലയമാണ് പ്രശംസാപത്രം നടിയ്ക്ക് നല്‍കിയിരിക്കുന്നത്. കൃത്യമായി ടാക്‌സ് നല്‍കുന്നവര്‍ക്ക് കേന്ദ്ര സര്‍ക്കാര്‍ ഇത്തരത്തില്‍ പ്രശംസാപത്രം നല്‍കി വരുന്നുണ്ട്. കഴിഞ്ഞ ദിവസങ്ങളില്‍ നടന്‍ മോഹന്‍ലാലിനെ തേടിയും ആന്റണി പെരുമ്പാവൂരിന്റെ ആശിര്‍വാദ് സിനിമാസിനെ തേടിയും കേന്ദ്രത്തിന്റെ അം?ഗീകാരം എത്തിയിരുന്നു. ഔദ്യോഗിക ഫേസ്ബുക്ക് പേജിലൂടെ ആശീര്‍വാദ് സിനിമാസ് സന്തോഷം പങ്കുവെച്ചിരുന്നു. തനിക്ക് സര്‍ട്ടിഫിക്കറ്റ് സമ്മാനിച്ചതില്‍ കേന്ദ്ര സര്‍ക്കാരിന് മോഹന്‍ലാല്‍ നന്ദി അറിയിച്ചു. ഇന്ത്യക്കാരനായതില്‍ അഭിമാനിക്കുന്നുവെന്നും മോഹന്‍ലാല്‍ സോഷ്യല്‍ മീഡിയയില്‍ കുറിച്ചു. രാഷ്ട്രനിര്‍മ്മാണത്തിന്റെ ഭാഗമാകാനും നിങ്ങള്‍ക്കൊപ്പം നടക്കാനും അനുവദിച്ചതിന് നന്ദി പറയുന്നവെന്നും അഭിമാന നിമിഷമാണിതെന്നും അദ്ദേഹം ഫേസ്ബുക്കില്‍ കുറിച്ചു. പിന്നാലെയാണ് മലയാളത്തിന്റെ പ്രിയ നടിയെ തേടിയും കേന്ദ്രത്തിന്റെ അംഗീകാരം എത്തിയത്. ലളിതം സുന്ദരം, മേരി ആവാസ് സുനോ, ജാക്ക് ആന്‍ഡ് ജില്‍ എന്നിവയാണ് മഞ്ജുവിന്റേതായി ഈ വര്‍ഷം റിലീസ് ചെയ്ത സിനിമകള്‍. തമിഴില്‍ അജിത്തിന്റെ നായികയായി എച്ച്. വിനോദ് സംവിധാനം ചെയ്യുന്ന ചിത്രത്തിലാണ് ഇപ്പോള്‍ താരം അഭിനയിക്കുന്നത്.