മുതിര്‍ന്ന സി.പി.എം നേതാവ് ഡി. ബാലചന്ദ്രന്‍ അന്തരിച്ചു

മുതിര്‍ന്ന സി.പി.എം നേതാവും അദ്ധ്യാപകനുമായിരുന്ന കൊല്ലം മയ്യനാട് സുമതി ഭവനില്‍ ഡി. ബാലചന്ദ്രന്‍ (90) അന്തരിച്ചു. കൊല്ലം എന്‍.എസ് ആശുപത്രിയിലായിരുന്നു അന്ത്യം. ഏറെക്കാലം സി.പി.എം ഏരിയാ കമ്മിറ്റി അംഗവും മയ്യനാട് പഞ്ചായത്തിന്റെയും മയ്യനാട് റീജിയണല്‍ സര്‍വീസ് സഹകരണ ബാങ്കിന്റെയും പ്രസിഡന്റുമായിരുന്നു. പ്രായാധിക്യത്തെ തുടര്‍ന്ന് സമീപകാലത്ത് പാര്‍ട്ടിയിലെ പ്രധാന ചുമതലകളില്‍ നിന്ന് ഒഴിവായിരുന്നു. കേരള പഞ്ചായത്ത് പ്രസിഡന്റ്സ് അസോസിയേഷന്‍ മുന്‍ ജനറല്‍ സെക്രട്ടറിയും കേരള പ്രൈവറ്റ് ടീച്ചേഴ്‌സ് യൂണിയന്‍ സ്ഥാപകനേതാവും സംസ്ഥാന സെക്രട്ടറിയുമായിരുന്നു. കൊല്ലം എന്‍.എസ് സഹകരണ ആശുപത്രിയുടെ സ്ഥാപക സെക്രട്ടറിയാണ്. മികച്ച സഹകാരിക്കുള്ള സംസ്ഥാന അവാര്‍ഡ്, മികച്ച ഗ്രന്ഥശാലാ പ്രവര്‍ത്തനത്തിനുള്ള സംസ്ഥാന അവാര്‍ഡ് തുടങ്ങിയ പുരസ്‌കാരങ്ങള്‍ ലഭിച്ചിട്ടുണ്ട്. മയ്യനാട് ഹൈസ്‌കൂള്‍ അദ്ധ്യാപകനായിട്ടായിരുന്നു ഔദ്യോഗിക ജീവിതത്തിന്റെ തുടക്കം. ദീര്‍ഘകാലം ഇതേ സ്‌കൂളില്‍ ഹെഡ്മാസ്റ്ററായിരുന്നു. ആരോഗ്യപ്രശ്‌നങ്ങള്‍ അലട്ടുന്നതു വരെ സി.പി.ഐ.എം വേദികളില്‍ സജീവമായിരുന്നു. മയ്യനാട് ഹൈസ്‌കൂള്‍ അദ്ധ്യാപികയായിരുന്ന പി. ലീലാവതിയാണ് ഭാര്യ. മക്കള്‍: കേരളകൗമുദി മുന്‍ എക്‌സിക്യുട്ടീവ് എഡിറ്റര്‍ ബി.സി. ജോജോ, ചലച്ചിത്ര നിര്‍മ്മാതാവ് ബി.സി. ജോഷി. മരുമക്കള്‍: ഡോ. ടി.കെ സുഷമ (വര്‍ക്കല എസ്.എന്‍ കോളേജ് ഹിന്ദി വിഭാഗം റിട്ട. അസോസിയേറ്റ് പ്രൊഫസര്‍), എസ്. ബിന്ദു (മയ്യനാട് എച്ച്.എസ്.എസ് റിട്ട. അദ്ധ്യാപിക).