ജ്വല്ലറിയില്‍നിന്ന് നെക്ലേസ് വാങ്ങിയത് 95% ഡിസ്‌കൗണ്ടില്‍; സുധേഷ് കുമാറിനെതിരെ നടപടിയുണ്ടായേക്കും

ജയില്‍ മേധാവി ഡിജിപി സുധേഷ് കുമാറിനെതിരെ അച്ചടക്ക നടപടിയുണ്ടായേക്കും. ജ്വല്ലറിയില്‍നിന്ന് 95% ഡിസ്‌കൗണ്ടില്‍ നെക്ലേസ് വാങ്ങി, വിജിലന്‍സ് ഡയറക്ടറായിരിക്കേ സഹപ്രവര്‍ത്തകര്‍ക്കെതിരെ കള്ളക്കേസ് റജിസ്റ്റര്‍ ചെയ്തു തുടങ്ങിയ ആരോപണങ്ങള്‍ സുധേഷിനെതിരെ ഉയര്‍ന്നിരുന്നു. ചില വിദേശയാത്രകളും വിവാദമായി. ആരോപണങ്ങള്‍ ശരിയാണെന്നായിരുന്നു ആഭ്യന്തരവകുപ്പിന്റെ അന്വേഷണത്തില്‍ കണ്ടെത്തിയത്. ആഭ്യന്തരവകുപ്പിന്റെ റിപ്പോര്‍ട്ട് മുഖ്യമന്ത്രിയുടെ പരിഗണനയിലാണ്. ഒക്ടോബറില്‍ സുധേഷ് വിരമിക്കും. ആരോപണങ്ങളില്‍ കഴമ്പുണ്ടെന്നു കണ്ടെത്തിയതിനെ തുടര്‍ന്നാണ് സുധേഷിനെ വിജിലന്‍സില്‍നിന്ന് ജയില്‍ വകുപ്പിലേക്കു മാറ്റിയത്. തലസ്ഥാനത്തെ ജ്വല്ലറിയില്‍നിന്ന് ഏഴു പവന്റെ നെക്ലേസ് 95% ഡിസ്‌കൗണ്ടില്‍ വാങ്ങിയതായി സര്‍ക്കാരിനു പരാതി ലഭിച്ചിരുന്നു. അന്വേഷണത്തില്‍ ഇതു ശരിയാണെന്നു വ്യക്തമായി. വിദേശ യാത്രകള്‍ നടത്തിയത് വ്യവസായിയുടെ പണം കൊണ്ടാണെന്നും പരാതി ലഭിച്ചിരുന്നു. ഈ പരാതിയും ശരായാണെന്നാണ് ആഭ്യന്തര അന്വേഷണത്തില്‍ കണ്ടെത്തിയത്. ഡിജിപി സ്ഥാനത്തേക്കു പരിഗണിക്കപ്പെട്ടിരുന്ന ടോമിന്‍ ജെ.തച്ചങ്കരി ഐപിഎസിനെതിരായ വിജിലന്‍സ് കേസ് സുധേഷ് അനിശ്ചിതമായി നീട്ടികൊണ്ടുപോയതായും ആക്ഷേപം ഉയര്‍ന്നിരുന്നു. സുധേഷിന്റെ മകള്‍ പൊലീസ് ഡ്രൈവറായ ഗവാസ്‌കറെ മര്‍ദിച്ച കേസ് അന്വേഷിച്ച എസ്പിയെ കള്ളക്കേസില്‍ കുടുക്കാന്‍ നീക്കം നടത്തിയതും ആഭ്യന്തര അന്വേഷണത്തില്‍ തെളിഞ്ഞു.