ഇന്‍ഡിഗോ നികുതിയും പിഴയുമടച്ചു; കസ്റ്റഡിയിലെടുത്ത ബസ് ഇന്ന് വിട്ടുകൊടുക്കും

കോഴിക്കോട്: മോട്ടര്‍ വാഹന വകുപ്പ് കസ്റ്റഡിയിലെടുത്ത ബസിന്റെ നികുതി കുടിശിക ഇന്‍ഡിഗോ എയര്‍ലൈന്‍സ് അടച്ചു. പിഴയടക്കം 48,000 രൂപ ഓണ്‍ലൈനായാണ് അടച്ചത്. ബസ് ഇന്ന് രാവിലെ വിട്ടുകൊടുക്കും. റോഡ് നികുതി കുടിശിക വരുത്തിയതിനെ തുടര്‍ന്ന് ചൊവ്വാഴ്ചയാണ് മോട്ടര്‍ വാഹന വകുപ്പ് ബസ് കസ്റ്റഡിയിലെടുത്തത്. കരിപ്പൂര്‍ വിമാനത്താവളത്തിനുള്ളില്‍ സര്‍വീസ് നടത്തുന്ന ബസ് അറ്റകുറ്റപ്പണിക്കായി ഫറോക്ക് ചുങ്കത്തെ വര്‍ക് ഷോപ്പിലെത്തിച്ചപ്പോഴാണു പിടിച്ചത്. 6 മാസത്തെ കുടിശികയായി 31,500 രൂപ റോഡ് നികുതിയും 7500 രൂപ പിഴയും 3150 രൂപ പലിശയുമടക്കം 42,150 രൂപ അടയ്ക്കാനുണ്ടെന്ന് ജോയിന്റ് ആര്‍ടിഒ സാജു എ.ബക്കര്‍ പറഞ്ഞിരുന്നു. രാമനാട്ടുകരയില്‍ പതിവു പരിശോധന നടത്തുന്നതിനിടെയാണു ബസ് കടന്നുപോയത്. ഓണ്‍ലൈനില്‍ രേഖകള്‍ പരിശോധിച്ചപ്പോള്‍ നികുതി അടച്ചില്ലെന്നു കണ്ടെത്തിയ ഉദ്യോഗസ്ഥര്‍ പിന്തുടര്‍ന്നു കസ്റ്റഡിയിലെടുക്കുകയായിരുന്നു. ഇന്നലെ മറ്റൊരു ബസിന് കൂടി നികുതി കുടിശിഖ ചൂണ്ടിക്കാട്ടി നോട്ടീസ് നല്‍കിയിട്ടുണ്ട്.