‘തന്ത്രപ്രധാന വിഷയങ്ങളില്‍ സഹകരണം’; സൗദിയും ഫ്രാന്‍സും തമ്മില്‍ ധാരണ

തന്ത്രപ്രധാന വിഷയങ്ങളില്‍ സഹകരണം ഉറപ്പു വരുത്താന്‍ സൗദിയും ഫ്രാന്‍സും തമ്മില്‍ ധാരണ. ഫ്രഞ്ച് പ്രസിഡന്റ് ഇമ്മാനുവല്‍ മാക്രോണും സൗദി കിരീടാവകാശി മുഹമ്മദ് ബിന്‍ സല്‍മാനും തമ്മിലുള്ള കൂടിക്കാഴ്ചയിലാണ് തീരുമാനം. ഉഭയകക്ഷി ചര്‍ച്ചകള്‍ ഇരു രാജ്യങ്ങളും തമ്മിലുള്ള തന്ത്രപരമായ പങ്കാളിത്തം മെച്ചപ്പെടുത്തുന്നതിനുള്ള പരസ്പര ആഗ്രഹത്തിന് ഊന്നല്‍ നല്‍കിയിട്ടുണ്ടെന്ന് മുഹമ്മദ് ബിന്‍ സല്‍മാന്‍ പറഞ്ഞു. എല്ലാ മേഖലകളിലും തന്ത്രപരമായ പങ്കാളിത്തം ശക്തിപ്പെടുത്താന്‍ ഇരു രാജ്യങ്ങളും തീരുമാനിച്ചു. പൊതു താല്‍പ്പര്യമുള്ള വിഷയങ്ങളില്‍ ഏകോപനവും കൂടിയാലോചനയും തുടരും. മേഖലയിലെ സുരക്ഷയും സ്ഥിരതയും ശക്തിപ്പെടുത്താന്‍ ഫ്രാന്‍സ് ഒപ്പുമുണ്ടാകുമെന്നും സൗദി കിരീടാവകാശിക്ക് ഉറപ്പും നല്‍കി. മൂന്ന് ദിവസം നീണ്ട യൂറോപ്പ് യാത്ര പൂര്‍ത്തിയാക്കി സൗദി കിരീടാവകാശി മടങ്ങി. ഊഷ്മളമായ സ്വീകരണമാണ് ഗ്രീസില്‍ നിന്നും ഫ്രാന്‍സിലെത്തിയ സൗദി കിരീടാവകാശിക്ക് ലഭിച്ചത്. വ്യാഴാഴ്ച പാരീസിലെത്തിയ കിരീടാവകാശിക്ക് ഫ്രഞ്ച് പ്രസിഡന്റിന്റെ ഔദ്യോഗിക വസതിയായ എലിസീ കൊട്ടാരത്തിലായിരുന്നു സ്വീകരണ ചടങ്ങുകളും അത്താഴവും.