കടം വാങ്ങിയത് തിരികെനല്‍കിയില്ല; അരലക്ഷം വിലവരുന്ന ആഡംബരപൂച്ചകളെ എയര്‍ഗണ്‍ ചൂണ്ടി തട്ടിയെടുത്തു

കോവളം: മയക്കുമരുന്നുമായി കോവളത്തെ സ്വകാര്യ ഹോട്ടലില്‍നിന്ന് അറസ്റ്റുചെയ്ത മൂന്നു പ്രതികളിലൊരാളായ ജിന്‍സണ്‍ ജോസ് ആഡംബരപ്പൂച്ചകളെ മോഷ്ടിച്ചകേസിലും പ്രതി. ഇയാളെ അന്വേഷിച്ച് തൊടുപുഴ മുട്ടം പോലീസ് കോവളത്ത് എത്തി. ജിന്‍സണ്‍, സുഹൃത്തുക്കളായ ഓള്‍സെയിന്റ്സ് സ്വദേശി അനസ്, പൂന്തുറ മാണിക്യവിളാകം സ്വദേശി നിസാം എന്നിവരെ കഴിഞ്ഞ ദിവസം കോവളം പോലീസ് അറസ്റ്റുചെയ്തിരുന്നു. ജിന്‍സണ്‍ തൊടുപുഴ മ്റാലായിലെ വീട്ടില്‍ കയറി സുഹൃത്തായ അജ്മലിന്റെ ഭാര്യ ഫാത്തിമയെ എയര്‍ഗണ്‍ ചൂണ്ടി ഭീഷണിപ്പെടുത്തി അവിടെയുണ്ടായിരുന്ന 50,000 രൂപ വിലമതിക്കുന്ന ആഡംബര പൂച്ചകളെ തട്ടിയെടുത്താണ് കോവളത്ത് എത്തിയത്. മുട്ടം പോലീസ് സ്റ്റേഷനിലെ എസ്.എച്ച്.ഒ. പ്രിന്‍സ് ജോസഫിന്റെ നേതൃത്വത്തിലുള്ള പോലീസ് സംഘമാണ് കോവളത്തെ ഹോട്ടലിലും പോലീസ് സ്റ്റേഷനിലുമെത്തി അന്വേഷണം നടത്തി. ഹോട്ടലിലെ മുറിയില്‍ നിന്നും പൂച്ചകളിലൊരെണ്ണത്തെ പോലീസ് കണ്ടെത്തി. യുവാക്കള്‍ ഹോട്ടലില്‍ രണ്ട് പൂച്ചകളുമായെത്തിയെന്നാണ് പോലീസിന് ലഭിച്ച വിവരം. മറ്റൊന്നിനെ കണ്ടെത്തിയില്ലെന്ന് പോലീസ് പറഞ്ഞു. ജിന്‍സന്റെ പക്കല്‍ നിന്നും അജ്മല്‍ കടം വാങ്ങിയ പണം തിരികെ നല്‍കാത്തതിനെ തുടര്‍ന്നായിരുന്നു വീട്ടിലെത്തി ഇയാള്‍ ആഡംബര പൂച്ചകളെ തട്ടിക്കൊണ്ടുപോയത്. അജ്മല്‍ തൊടുപുഴ മുട്ടം പോലീസില്‍ പരാതി നല്‍കിയിരുന്നു. സ്ത്രീയെ വീട്ടില്‍ കയറി ഭീഷണിപ്പെടുത്തിയതിനും പൂച്ചകളെ കടത്തിക്കൊണ്ടുപോയതിനും മുട്ടം പോലീസ് കേസെടുത്തിരുന്നു. മോഷണക്കുറ്റം ചുമത്തിയ ജിന്‍സനെ കസ്റ്റഡിയില്‍ വാങ്ങി ചോദ്യംചെയ്യുമെന്ന് മുട്ടം എസ്.എച്ച്.ഒ. പ്രിന്‍സ് ജോസഫ് അറിയിച്ചു.