ഓടിക്കാതെ ഏഴു വര്‍ഷം; നിഷാമിന്റെ ഒരു കോടിയുടെ ആഡംബര കാര്‍ നശിച്ചു

തൃശൂര്‍: പേരാമംഗലം പൊലീസ് സ്റ്റേഷന്‍ വളപ്പില്‍ വരുന്ന ഓരോരുത്തരും ശ്രദ്ധിക്കുന്ന വാഹനമുണ്ട്. ആഡംബര വാഹനമായ ഹമ്മര്‍. തൃശൂരില്‍ ഫ്‌ലാറ്റിലെ സുരക്ഷാ ജീവനക്കാരന്‍ ചന്ദ്രബോസിനെ കാറിടിപ്പിച്ചു കൊന്ന കേസിലെ പ്രതി മുഹമ്മദ് നിഷാമിന്റെ വാഹനം. അമേരിക്കന്‍ പട്ടാളക്കാര്‍ ഉപയോഗിച്ചിരുന്ന വാഹനം. പിന്നീട്, അമേരിക്കയില്‍ നിന്ന് ഇറക്കുമതി ചെയ്തു. മഞ്ഞിലും മഴയത്തും മലമുകളിലൂടെ എങ്ങനെ വേണേലും ഓടിക്കാം. സുരക്ഷിതമാണ് വാഹനം. ഏതെങ്കിലും വാഹനം ഇതില്‍ വന്നിടിച്ചാലും യാത്രക്കാര്‍ക്ക് ഒന്നും സംഭവിക്കില്ല. അത്രയ്ക്കും പവര്‍ഫുള്‍ വാഹനം. കേരളത്തില്‍ തന്നെ അപൂര്‍വം ചിലര്‍ക്കു മാത്രമേ ഈ വാഹനമുള്ളൂ. അതിലൊന്ന് നിഷാമിനായിരുന്നു. ആഡംബര പാര്‍പ്പിട സമുച്ചയത്തിലെ സുരക്ഷാ ജീവനക്കാരനെ കാറിടിച്ച് കൊന്നതോടെയാണ് നിഷാം പിടിയിലായത്. അന്നുതന്നെ വണ്ടിയും പേരാമംഗലം പൊലീസ് കസ്റ്റഡിയിലെടുത്തു. പിന്നീട്, ഇത്രയും കാലം വാഹനം പേരാമംഗലം സ്റ്റേഷന്‍ വളപ്പില്‍ തന്നെ മഴയും വെയിലും കൊണ്ട് കിടക്കുന്നു. കൊലക്കേസുകളില്‍ പ്രതികള്‍ ഉപയോഗിച്ച വാഹനത്തിന്റെ ആര്‍സി റജിസ്‌ട്രേഷന്‍ റദ്ദാക്കാനും വണ്ടി പൊളിക്കാനുമാണ് മോട്ടോര്‍ വാഹന വകുപ്പ് ആലോചിക്കുന്നത്. ട്രാന്‍സ്‌പോര്‍ട്ട് കമ്മിഷണറായി എഡിജിപി. എസ്.ശ്രീജിത് ചുമതലയേറ്റ ശേഷമാണ് ഇത്തരമൊരു ആലോചന വന്നത്. കൊലക്കേസുകളില്‍ ഉള്‍പ്പെട്ട ഇത്തരം വാഹനങ്ങളുടെ പട്ടിക മോട്ടോര്‍ വാഹന വകുപ്പ് പൊലീസിനോട് ആവശ്യപ്പെട്ടിട്ടുണ്ട്. പക്ഷേ, ആര്‍സി റദ്ദാക്കി വണ്ടി പൊളിക്കാന്‍ ഇപ്പോഴത്തെ നിയമപ്രകാരം സാധിക്കില്ല. നിയമനിര്‍മാണം വേണ്ടി വരും. അതിനുള്ള ശ്രമങ്ങള്‍ മോട്ടോര്‍ വാഹന വകുപ്പ് തുടങ്ങി.