അമലാപോളിന്റെ പരാതിയിൽ അറസ്റ്റിലായ ഭവ്നിന്ദർ സിങ് ദത്തിന് ജാമ്യം

ചെന്നൈ: സ്വകാര്യചിത്രങ്ങൾ പുറത്തുവിടുമെന്ന് ഭീഷണിപ്പെടുത്തി പണം തട്ടാൻ ശ്രമിച്ചെന്ന നടി അമലാ പോളിന്റെ പരാതിയിൽ അറസ്റ്റിലായ മുൻസുഹൃത്തും ഗായകനുമായ ഭവ്നിന്ദർ സിങ് ദത്തിന് ജാമ്യം. വിഴുപുരം ജില്ലയിലെ വാനൂർ മജിസ്‌ട്രേറ്റ് കോടതിയാണ് ജാമ്യം അനുവദിച്ചത്. ഭവ്‌നിന്ദർ സിങ് നിരപരാധിയാണെന്നും വിരോധത്തിന്റെ പേരിലാണ് അമലപോൾ പോലീസിൽ പരാതി നൽകിയതെന്നും ഇദ്ദേഹത്തിന്റെ അഭിഭാഷകൻ വാദിച്ചു. ഇരുവരും നാലുവർഷം മുമ്പ് വിവാഹിതരായതിന്റെ തെളിവുകളും സമർപ്പിച്ചു. 2018 നവംബറിൽ അമലാ പോളും ഭവ്‌നിന്ദർ സിങ്ങും തമ്മിലുള്ള വിവാഹം നടന്നുവെന്നാണ് അഭിഭാഷകൻ കോടതിയെ അറിയിച്ചത്. പരമ്പരാഗത പഞ്ചാബി രീതിയിലായിരുന്നു വിവാഹം. പിന്നീട് ഇരുവരും തമ്മിൽ പിരിഞ്ഞതിന്റെ പേരിലുള്ള വിരോധമാണ് പരാതിക്ക്‌ കാരണമെന്നും കോടതിയിൽ വാദിക്കുകയായിരുന്നു. തുടർന്നാണ് കോടതി ജാമ്യം അനുവദിച്ചത്. സുഹൃത്തുക്കളായിരുന്നപ്പോൾ എടുത്ത ചിത്രങ്ങൾ സാമൂഹികമാധ്യമങ്ങളിലൂടെ പുറത്തുവിടുമെന്ന് ഭീഷണിപ്പെടുത്തി പണം ആവശ്യപ്പെട്ടുവെന്നായിരുന്നു അമലാ പോളിന്റെ പരാതി. കേസെടുത്ത വിഴുപുരം പോലീസ് ഓഗസ്റ്റ് 30-ന് ഭവ്‌നിന്ദർ സിങ്ങിനെ അറസ്റ്റുചെയ്തു. 2018-ൽ അമലാ പോളും ഭവ്നിന്ദറും സിനിമാ നിർമാണക്കമ്പനി രൂപവത്കരിച്ചിരുന്നു. വിഴുപുരം ജില്ലയിൽ ഓറോവില്ലിന് സമീപമുള്ള പെരിയമുതലിയാർ ചാവടിയിലായിരുന്നു ഭവ്‌നിന്ദർ താമസിച്ചത്‍. ഇതിനിടെ അമലയും ഭവ്‌നിന്ദറും ബിസിനസ് പങ്കാളിത്തം അവസാനിപ്പിച്ചു. എന്നാൽ, കമ്പനിക്കായി അമല നിക്ഷേപിച്ച പണം ഭവ്‌നിന്ദർ തട്ടിയെടുത്തതായി ആരോപണമുണ്ട്.