ഭഗവതിയെ കാര്‍ക്കിച്ചു തുപ്പിയ എംടിയുടെ വെളിച്ചപ്പാടിനെ ഹിന്ദുക്കള്‍ എതിര്‍ത്തില്ല,കാരണം നിരത്തി ശശികല

ഭഗവതിയെ കാര്‍ക്കിച്ചു തുപ്പിയ എം ടിയുടെ വെളിച്ചപ്പാടിനെ ആരും എതിര്‍ക്കാതിരുന്നത് അന്ന് ഹിന്ദുക്കളോ ഹിന്ദു സംഘടനകളോ ശക്തമല്ലാതിരുന്നതു കൊണ്ടാണെന്ന് ഹിന്ദു ഐക്യവേദി സംസ്ഥാന പ്രസിഡന്റ് കെപി ശശികല.നിര്‍മാല്യം ഇറങ്ങിയത് ഇന്നായിരുന്നെങ്കില്‍ തല കാണില്ലായിരുന്നെന്ന് എം ടി തന്നെ ഒരിക്കല്‍ പറഞ്ഞതായി ശശികല കൂട്ടിച്ചേര്‍ത്തു.

എം ടിയുടെ രണ്ടാമൂഴം ,മഹാഭാരതം എന്ന പേരില്‍ സിനിമയാകുന്നതിനെതിരെ നേരത്തേ ശശികല രംഗത്തു വന്നിരുന്നുരണ്ടാമൂഴം ആ പേരില്‍ പുറത്തിറക്കായില്‍ മതിയെന്നും അവര്‍ പറഞ്ഞു.രണ്ടാമൂഴം മഹാഭാരതത്തെ വികലമായി ചിത്രീകരിച്ചിരിക്കുന്ന നോവലാണെന്നും അതിനാല്‍ വ്യാസനെഴുതിയ പരകോടി പഴക്കമുള്ള മഹാഭാരതത്തിന്റെ പേര് അതിനു നല്‍കാനാകില്ലെന്നും അഥവാ നല്‍കിയാല്‍ സിനിമ തീയേറ്റര്‍ കാണില്ലെന്നും ശശികല പറഞ്ഞിരുന്നു.

1973ലാണ് എംടി പള്ളിവാളും കാല്‍ച്ചിലമ്പുമെന്ന സ്വന്തം ചെറുകഥയെ ആസ്പദമാക്കി നിര്‍മാല്യം എന്ന സിനിമ അണിയിച്ചൊരുക്കുന്നത്. സിനിമയുടെ കഥ,തിരക്കഥ,സംവിധാനം എന്നിവയെല്ലാം എംടിയാണ് നിര്‍വഹിച്ചത്. നിര്‍മാല്യം മികച്ച ചിത്രത്തിനുളള ദേശീയ പുരസ്‌കാരം നേടിയിരുന്നു. ചിത്രത്തില്‍ വെളിച്ചപ്പാടായി അഭിനയിച്ച പിജെ ആന്റണിക്ക് മികച്ച നടനുളള അവാര്‍ഡും ലഭിച്ചിരുന്നു