വിവാദത്തിന്റെ മറവില്‍ മൂന്നാറില്‍ ഉദ്യോഗസ്ഥര്‍ക്ക് കൂട്ടത്തോടെ സ്ഥലം മാറ്റം !

പൊതുജനവും മാധ്യമങ്ങളും ഇപ്പോള്‍ നടനും അതുമായി ബന്ധപ്പെട്ട വിവാദങ്ങള്‍ക്കും പിന്നാലെ ആണല്ലോ. അതുകൊണ്ട് വളരെ ഗൗരവമുള്ള പല വിഷയങ്ങളും അധികമാരും അറിയാതെ നടപ്പാക്കുന്നുണ്ടെന്നുള്ള വിവരം വിസ്മരിക്കരുത്. ഭൂമി കൈയ്യേറ്റം, നഴ്‌സുമാരുടെ സമരം, വിലക്കയറ്റം, ജിഎസ്ടി കൊള്ള ഇതൊന്നും ഇപ്പോള്‍ ആര്‍ക്കും അറിയേണ്ട. എല്ലാവരും നടന് പിന്നാലെ പായുകയാണ്. എന്തിന്..? പൊതുജനത്തെ ബാധിക്കുന്ന നിരവധി പ്രശ്‌നങ്ങള്‍ പരിഹാരം കാണാതെ കിടക്കുമ്പോള്‍ ഒരു ക്വട്ടേഷന്‍ കേസ്സിന്റെ പിന്നാലെ ഇങ്ങനെ പായുന്നതുകൊണ്ട് സാധാരണക്കാരന് എന്താണ് നേട്ടം.

മൂന്നാറിലെ ഭൂമി കൈയ്യേറ്റം തുടര്‍ന്നുള്ള വിവാദങ്ങളും എല്ലാവരും മറന്നെന്നു തോന്നുന്നു. മാധ്യമശ്രദ്ധ പൂര്‍ണ്ണമായും ദിലീപിലേക്ക് തിരിഞ്ഞതോടെ മൂന്നാറില്‍ കയ്യേറ്റക്കാര്‍ക്ക് ഒത്താശചെയ്തുകൊണ്ടുള്ള നടപടിയാണ് സര്‍ക്കാരിന്റെ ഭാഗത്ത് നിന്നും ഉണ്ടായിരിക്കുന്നതെന്നാണ് മനസ്സിലാക്കാന്‍ കഴിയുന്നത് . കയ്യേറ്റം ഒഴിപ്പിക്കാന്‍ മുന്നോട്ടുവന്ന ഉദ്യോഗസ്ഥരെ കൂട്ടത്തോടെ സ്ഥലംമാറ്റി. നാല് റവന്യൂ ഉദ്യോഗസ്ഥരെയാണ് സ്ഥലംമാറ്റിയത്. ആര്‍.ഡി.ഒ ഓഫീസിലെ ഹെഡ് ക്ലാര്‍ക്ക്, സര്‍വ്വേയര്‍ എന്നിവരെയാണ് സ്ഥലം മാറ്റിയത്. ദേവികുളം തഹസില്‍ദാരെ നേരത്തെ സ്ഥലംമാറ്റിയിരുന്നു.

ദേവികുളം സബ് കലക്ടര്‍ സ്ഥാനത്തുന്ന് ശ്രീറാം വെങ്കിട്ടരാമനെ മാറ്റിയതോടെ കയ്യേറ്റം ഒഴിപ്പിക്കല്‍ നടപടികള്‍ അവസാനിച്ചതായി സൂചനയുണ്ടായിരുന്നു. എന്നാല്‍ ഇരു ചെവി അറിയാതെ തടസ്സം നില്‍ക്കുന്നു എന്ന് ബോധ്യമായ ഉദ്യോഗസ്ഥരെ സ്ഥലം മാറ്റുകയായിരുന്നു. എന്നാല്‍ ഉദ്യോഗസ്ഥന് അര്‍ഹതപ്പെട്ട സ്ഥാനക്കയറ്റം നല്‍കുകയാണെന്നായിരുന്നു സര്‍ക്കാരിന്റെ നിലപാട്.