വി ഡി സതീശന്റെ മകളെ എസ്എഫ്‌ഐ യിലെടുത്തേ?വിശദീകരണവുമായി സതീശന്‍

മകള്‍ എസ്എഫ്‌ഐയില്‍ ചേര്‍ന്നെന്ന പ്രചാരണം അടിസ്ഥാന രഹിതമാണെന്ന് വി ഡി സതീശന്‍ എംഎല്‍എ.മകള്‍ ഇപ്പോഴും കെഎസ്‌യു പ്രവര്‍ത്തക തന്നെയാണെന്നും കെഎസ്‌യുവിന്റെ നേതൃത്വത്തില്‍ ജനസേവാ ശിശുഭവനില്‍ ക്ലാസെടുക്കാന്‍ പോയപ്പോള്‍ മകള്‍ അതില്‍ വോളണ്ടിയറായിരുന്നു.ഇക്കാര്യങ്ങളെല്ലാം സത്യമായിരിക്കെ തന്നെ അപമാനിക്കാന്‍ മനപൂര്‍വ്വമാണ് ഇത്തരം അടിസ്ഥാന രഹിതമായ വാര്‍ത്തകള്‍ പ്രചരിപ്പിക്കുന്നതെന്ന് സതീശന്‍ ഫേസ് ബുക്കില്‍ കുറിച്ചു

താന്‍ ബിജെപിയില്‍ ചേരാന്‍ പോകുന്നെന്ന് പ്രചരിപ്പിക്കുന്നവര്‍ തന്നെയാണ് ഇതിനു പിന്നിലെന്നും സതീശന്‍ ആരോപിച്ചു.നുണപ്രചരിപ്പിക്കുന്നവര്‍ വാസ്തവമറിയാന്‍ ശ്രമിക്കണമെന്നും അവരവരുടെ സ്വന്തം മനസാക്ഷിയോട് ചോദിക്കണമൈന്നും അദ്ദേഹം പറഞ്ഞു

പോസ്റ്റിന്റെ പൂര്‍ണരൂപം,

എന്റെ മകള്‍ എസ് എഫ് ഐയില്‍ ചേര്‍ന്നു എന്ന വ്യാജ പ്രചരണം ഇന്ന് രാവിലെ മുതല്‍ സോഷ്യല്‍ മീഡിയയില്‍ നടക്കുകയാണ് . ഇത് ശുദ്ധ അസംബന്ധമാണ് . അവള്‍ കോളേജിലെ കെ.എസ്.യു .പ്രവര്‍ത്തകയാണ് . നേതാവല്ല . കോളേജിലെ കെ.എസ്.യു. യൂണിറ്റ് ജനസേവ ശിശുഭവനില്‍ കുട്ടികള്‍ക്ക് സൗജന്യമായി ട്യൂഷ്യന്‍ എടുക്കുവാന്‍ പോയപ്പോള്‍ അവള്‍ ആ ടീമിലെ വോളണ്ടിയറായിരുന്നു. സത്യമിതായിരിക്കെ എന്നെ അപകീര്‍ത്തിപ്പെടുത്തുവാന്‍ എന്റെ മകളെ വലച്ചിഴക്കുന്നത് ദൗര്‍ഭാഗ്യകരമാണ്.

ഞാന്‍ ബിജെപിയില്‍ ചേരുന്നു എന്ന വ്യാജ വാര്‍ത്ത പ്രചരിപ്പിച്ചവര്‍ തന്നെയാണ് ഇതിനു പിന്നിലെന്ന് എനിക്കറിയാം അവരൊന്നറിയണം .ഞാനിതെഴുതി കൊണ്ടിരിക്കുമ്‌ബോള്‍, മതേതര നിലപാട് ശക്തിയായി ഉയര്‍ത്തിപ്പിടിച്ചതിനെതിരെ ഹിന്ദു ഐക്യവേദിക്കാര്‍ എന്റെ വീട്ടിലേക്ക് മാര്‍ച്ച് നടത്തി കൊണ്ടിരിക്കുകയാണ് . പോസ്റ്റുകള്‍ വായിച്ചിട്ട് ഒന്നുമാലോചിക്കാതെ അത് പ്രചരിപ്പിച്ചവര്‍ ,അത് ശരിയായിരുന്നോ എന്ന് അവരുടെ സ്വന്തം മനസ്സാക്ഷിയോട് ചോദിക്കട്ടെ!