കൊളേജ് അധ്യാപകര്‍ക്ക് ദീപാവലി സമ്മാനം: ശമ്പളത്തില്‍ വന്‍ വര്‍ദ്ധനവ്

ന്യൂഡല്‍ഹി:കേന്ദ്ര,സംസ്ഥാന കൊളേജ് അധ്യാപകര്‍ക്ക് കേന്ദ്രത്തിന്റെ വക വമ്പന്‍ ദീപാവലി സമ്മാനം.ഏഴാം ശമ്പള കമ്മീഷന്‍ ശുപാര്‍ശയ്ക്കാണ് കേന്ദ്രത്തിന്റെ അംഗീകാരം.ഇതോടെ അധ്യാപകരുടെ ശമ്പളത്തില്‍ 22 മുതല്‍ 28 ശതമാനം വരെ വര്‍ദ്ധനവാണ് ഉണ്ടാകുന്നത്.കേന്ദ ഫണ്ട് ലഭിക്കുന്ന എല്ലാ കല്പിത സര്‍വ്വകലാശാലകള്‍ക്കും കേന്ദ്ര സര്‍വ്വകലാശാലകള്‍ക്കും ആനുകൂല്യം ബാധകമാണെന്ന് കേന്ദ്ര വിദ്യാഭ്യാസ മന്ത്രി പ്രകാശ് ജാവദേക്കര്‍ അറിയിച്ചു

ശമ്പള കമ്മീഷന്‍ നല്‍കിയ ശിപാര്‍ശ 34 ഭേദഗതികളോടെയാണ് മന്ത്രിസഭ അംഗീകരിച്ചിരിക്കുന്നത്. 2016 ജനുവരി ഒന്നുമുതല്‍ മുന്‍കാല പ്രാബല്യത്തോടെയാണ് ശമ്പളം ലഭിക്കുന്നത്. 329 സംസ്ഥാന സര്‍വകലാശാലകളും 12,912 കോളജുകളുമുള്‍പ്പെടെ 7.51 ലക്ഷം അധ്യാപകരാണ് ഏഴാം ശമ്പള കമ്മീഷന്റെ ഗുണഭോക്താക്കള്‍. കേന്ദ്രസര്‍ക്കാര്‍ സ്ഥാപനങ്ങളിലെ ജീവനക്കാര്‍ക്ക് ആനുകൂല്യങ്ങള്‍ വേഗത്തില്‍ ലഭിക്കുമെങ്കിലും സംസ്ഥാന സര്‍ക്കാര്‍ ജീവനക്കാര്‍ കുറച്ചു കാത്തിരിക്കേണ്ടിവരുമെന്ന് മന്ത്രി പറഞ്ഞു.