സൊമാലിയയില്‍ കനത്ത സ്‌ഫോടനം:ഇരുനൂറ്റമ്പതിലേറേ പേര്‍ കൊല്ലപ്പെട്ടു

മൊഗദിഷു::സൊമാലിയന്‍ തലസ്ഥാനമായ മൊഗദിഷുവില്‍ ഭീകരര്‍ നടത്തിയ ഇരട്ട സ്‌ഫോടനത്തില്‍ കൊല്ലപ്പെട്ടവരുടെ എണ്ണം ഇരുനൂറ്റിയന്‍പതു കവിഞ്ഞു.മൂന്നൂറിലേറെ പേര്‍ക്ക് പരിക്കേറ്റു.പരിക്കേറ്റ പലരുടെയും നില അതീവ ഗുരുതരമായതിനാല്‍ മരണ സംഖ്യ ഇനിയും ഉയര്‍ന്നേക്കും.

ഭീകരാക്രമണത്തിനു പിന്നില്‍ അല്‍ക്വയദയുമായി ബന്ധമുള്ള അലഷബാബാണെന്നാണ് സര്‍ക്കാര്‍ വിലയിരുത്തല്‍.അല്‍ ഷബാബ് മൊഗദിഷുവില്‍ നേരത്തേയും സ്‌ഫോടനങ്ങള്‍ നടത്തിയിരുന്നു.

രാജ്യത്തെ സുപ്രധാന മന്ത്രിമാരുടെ വസതികള്‍ക്കും സൊമാലിയന്‍ വിദേശകാര്യ മന്ത്രാലയത്തിനും സമീപത്താണ് സ്‌ഫോടനം നടന്നത്.മൊഗാദിഷുവിലെ ഒരു ഹോട്ടലിനു മുന്നില്‍ നിറുത്തിയിട്ടിരുന്ന ട്രക്ക് ബോംബാണ് ആദ്യം പൊട്ടിത്തെറിച്ചത്. സ്‌ഫോടനത്തില്‍ സമീപത്തെ നിരവധി കെട്ടിടങ്ങളും ഇരുമ്ബു ഗേറ്റുകളും പൂര്‍ണമായി തകര്‍ന്നു. നിരവധി വാഹനങ്ങള്‍ക്ക് തീ പിടിച്ചതായി വാര്‍ത്താ ഏജന്‍സികള്‍ റിപ്പോര്‍ട്ട് ചെയ്തു. രണ്ട് മണിക്കൂറിനു ശേഷമാണ് മെഡിന ജില്ലയില്‍ സമാനമായ സ്‌ഫോടനമുണ്ടായത്. രാജ്യത്തെ തിരക്കുപിടിച്ച നഗരങ്ങളില്‍ സ്‌ഫോടനമുണ്ടാക്കിയ പ്രഹരം ശക്തമാണ്. മരണ സംഖ്യ ഉയരാന്‍ സാദ്ധ്യതയുണ്ടെന്ന് ഔദ്യോഗിക വൃത്തങ്ങള്‍ അറിയിച്ചു. സ്‌ഫോടനം നടന്നത് തിരക്കുള്ള ജംഗ്ഷനിലായത് മരണസംഖ്യ വര്‍ദ്ധിക്കാന്‍ ഇടയായി. സംഭവത്തെ തുടര്‍ന്ന് സൊമാലിയന്‍ പ്രസിഡന്റ് മുഹമ്മദ് അബ്ദുള്ളാഹി മുഹമ്മദ് രാജ്യത്ത് മൂന്ന് ദിവസത്തെ ദുഃഖാചരണം പ്രഖ്യാപിച്ചു.