സോളാറില്‍ കത്തുന്ന കോണ്‍ഗ്രസിന് ആശ്വാസമായി ഫെനി ബാലകൃഷ്ണന്‍;ലൈംഗിക കഥകള്‍ മെനഞ്ഞത് ഗണേശെന്ന് ഫെനി

തിരുവനന്തപുരം:കേരളത്തെ ഞെട്ടിച്ച സരിതയുടെ ലൈംഗിക കഥകള്‍ പിന്നീട് കൂട്ടിച്ചേര്‍ത്തതാണെന്ന വാദവുമായി സരിതയുടെ ആദ്യ അഭിഭാഷകന്‍ ഫെനി ബാലകൃഷ്ണന്‍.സരിത ആദ്യം തനിക്ക് കൈമാറിയ കത്തില്‍ 21 പേജുകള്‍ മാത്രമാണുണ്ടായിരുന്നതെന്നും പിന്നീട് നാലു പേജ് കൂട്ടിച്ചേര്‍ത്തതാണെന്നുമാണ് ഫെനിയുടെ ആരോപണം.മാത്രമല്ല ലൈംഗിക ആരോപണങ്ങളും അതിലുള്‍പ്പെട്ട നേതാക്കന്‍മാരുടെ പേരുകളും എംഎല്‍എഗണേശ്കുമാറിന്റെ അറിവോടെ എഴുതിയതാണെന്നും ഫെനി വെളിപ്പെടുത്തുന്നു.സോളാര്‍ അഴിമതി ലൈംഗിക ആരോപണകേസ് കൊഴുക്കുന്നതിനിടയിലാണ് പുതിയ ആരോപണങ്ങളുമായി ഫെനി രംഗത്തെത്തിയിരിക്കുന്നത്.

സരിത കൈമാറിയ ആദ്യ കത്തിന്റെ കൂടെ നേതാക്കളുടെ പേരില്‍ ലൈംഗിക പീഡനവും കൂടി ഉള്‍പ്പെടുത്തി കത്ത് വിപുലപ്പെടുത്തിയത് കൊട്ടാരക്കരയിലെ ഗണേശിന്റെ വീട്ടില്‍ വെച്ചാണ്.തന്റെ കത്ത് തയ്യാറാക്കിയത് ഗണേശിന്റെ അടുത്ത ബന്ധുവാണെന്ന് ഫെനി വിശദമാക്കി.തന്റെ വാഹനത്തിലാണ് കത്ത് തയ്യാറാത്തിയത്.തന്റെയും ഗണേശിന്റെയും മൊബൈല്‍ ടവര്‍ ലൊക്കേഷന്‍ പരിശോധിച്ചാല്‍ അത് ബോധ്യമാകും. ഇക്കിളിപ്പെടുത്തുന്ന കൂടുതല്‍ കഥകള്‍ എഴുതിചേര്‍ക്കണമെന്ന് ഗണേശ് ആവശ്യപ്പെട്ടിരുന്നതായും ഫെനി വ്യക്തമാക്കി.മറ്റ് ചില നേതാക്കളെ കൂടി ഉള്‍പ്പെടുത്തണമെന്ന നിര്‍ദ്ദേശവും ഉണ്ടായി.2015 മാര്‍ച്ച് 13 നാണ് കത്ത് എഴുതിയത്.