മാണി ഇടത്തേയ്ക്കു ചാഞ്ഞാല്‍ കോട്ടയത്ത് സഭയുടെ സ്ഥാനാര്‍ത്ഥി

ലോക്‌സഭാ തിരഞ്ഞെടുപ്പിന് ഒരു വര്‍ഷം മാത്രം ശേഷിക്കേ മുന്നണികള്‍ നടത്തുന്ന തയ്യാറെടുപ്പുകള്‍ക്കു പിന്നാലെ കത്തോലിക്കാ സഭയും തിരഞ്ഞെടുപ്പില്‍ മല്‍സരിക്കാന്‍ തയ്യാറെടുക്കുന്നു.കേരളാ കോണ്‍ഗ്രസിനേയും കൊണ്ട് മാണി ഇടതു പാളയത്തിലേയ്ക്കു ചേക്കേറുന്ന പക്ഷം സഭയുടെ സ്ഥാനാര്‍ത്ഥിയെ കോട്ടയത്ത് നിര്‍ത്തി മല്‍സരിപ്പിക്കാനാണ് നീക്കം നടക്കുന്നത്.കഴിഞ്ഞ തിരഞ്ഞെടുപ്പില്‍ സ്വീകരിച്ച ഇടുക്കി മോഡല്‍ കോട്ടയത്തും നടപ്പാക്കാനാണ് നീക്കം.കഴിഞ്ഞ ലോക്‌സഭാ തിരഞ്ഞെടുപ്പില്‍ ഇടുക്കിയില്‍ ഹൈറേഞ്ച് സംരക്ഷണ സമിതിയുടെ നേതാവായ ജോയ്‌സ് ജോര്‍ജ്ജിനെ സഭയും സിപിഎമ്മും ഒരേ പോലെ പിന്തുണച്ച് എംപിയാക്കുകയായിരുന്നു.എന്നാല്‍ തിരഞ്ഞെടുപ്പിനു ശേഷം ജോയ്‌സ് ജോര്‍ജ്ജ് സിപിഎം അംഗത്വം സ്വീകരിക്കുകയും ചെയ്തിരുന്നു

ഇക്കാലമത്രയും കോണ്‍ഗ്രസിന്റെ കൂടെ നിന്ന മാണിയ്ക്കാണ് വോട്ടു ചെയ്തത്.വലത്തുവശത്ത് മാണിയില്ലെങ്കില്‍ കത്തോലിക്കാ സഭയുടെ വോട്ട് യുഡിഎഫിലേക്കില്ലെന്നു മാത്രമല്ല മാണി ചെന്നാലും ഇടതന് വോട്ട് ചെയ്യാന്‍ കത്തോലിക്കാസഭാ വിശ്വാസികള്‍ തയ്യാറാകില്ലെന്ന സൂചനയും സഭയുടെ പുതിയ തീരുമാനത്തോടെ സജീവമായിട്ടുണ്ട്‌

ഇതു സംബന്ധിച്ച് കഴിഞ്ഞ ദിവസം ചേര്‍ന്ന കോട്ടയം ,ഇടുക്കി വൈദീകരുടെയും അല്‍മായരുടേയും യോഗത്തിലാണ് തീരുമാനമായത്.നിലവില്‍ ഇടുക്കിയില്‍ വാര്‍ഡ് തലം വരെ ഹൈറേഞ്ച് സംരക്ഷണ സമിതിയുടെ സംവിധാനം പ്രവര്‍ത്തിക്കുന്ന അതേ മോഡലില്‍ ഓള്‍ കേരളാ കത്തോലിക്കാ കോണ്‍ഗ്രസിന്റെ നേതാക്കന്‍മാരോട് വാര്‍ഡ് തലം വരെ കര്‍മ്മനിരതനാവണമെന്ന നിര്‍ദ്ദേശവും അല്‍മായ-വൈദീക കൗണ്‍സില്‍ നല്‍കിയിട്ടുണ്ട്. കത്തോലിക്കാ സഭയുടെ മുഴുവന്‍ നേതാക്കളോടും സാമൂഹ്യ പ്രതിബദ്ധതയുള്ള വിഷയങ്ങളില്‍ ഇടപെട്ടു കൊണ്ട് സജീവമായി നിലനില്‍ക്കാനും നിര്‍ദ്ദേശമുണ്ട്.ഇവരെ മണ്ഡലത്തില്‍ പരിചയപ്പെടുത്താന്‍ ഫ്‌ലക്‌സ് ബോര്‍ഡുകള്‍ ഉള്‍പ്പടെയുള്ളവ സ്ഥാപിക്കുന്നതിനും തീരുമാനമായിട്ടുണ്ട്.

കര്‍ഷകരുടെ പ്രശ്‌നങ്ങളും കുടിവെള്ളം പ്രശ്‌നങ്ങളും എന്‍ജിഒ വഴി ഉയര്‍ത്തിക്കാട്ടി പരിഹാരമുണ്ടാക്കി അതിന്റെ ഖ്യാതി ഈ നേതാക്കന്‍മാരില്‍ എത്തിക്കാനുള്ള ശ്രമങ്ങളും സജീവമായി നിലനിര്‍ത്തുന്നുണ്ട്.വെള്ളിയാഴ്ച കോട്ടയത്തു ഓള്‍ കേരളാ കത്തോലിക്കാ കോണ്‍ഗ്രസിന്റെ ഉന്നതതലയോഗത്തിലാണ് തീരുമാനങ്ങള്‍.പത്രങ്ങളിലും ചാനലുകളിലും സഭയുടെ അല്‍മായ പ്രതിനിധികളായി സജീവമായി നിലനില്‍ക്കാനും കത്തോലിക്കാ നേതാക്കള്‍ക്ക് നിര്‍ദ്ദേശമുണ്ട്

മാണി ഇടത്തേയ്ക്കു പോയാല്‍ എതിര്‍പ്പുള്ള നേതാക്കെന്‍മാര്‍ക്ക് മറ്റൊരു കേരളാ കോണ്‍ഗ്രസ് ഉണ്ടാക്കാനുള്ള പിന്തുണ നല്‍കാതെ കത്തോലിക്കാ സഭയുടെ കീഴില്‍ നിന്ന് പ്രവര്‍ത്തിക്കാനുള്ള ഉപദേശം നല്‍കാനാണ് തീരുമാനം.ഔദ്യോഗിക സ്ഥാനമാനങ്ങളുള്ളവരാണെങ്കില്‍ സഭയുടെ കൂടെ നിന്ന് തിരഞ്ഞെടുപ്പിനെ നേരിടാനും തീരുമാനമുണ്ട്.

ഇതിനിടിയില്‍ മാണിയുടെ ഇടതുപ്രവേശനത്തിന്റെ ചര്‍ച്ചകള്‍ അന്തിമഘട്ടത്തില്‍ എത്തിനില്‍ക്കെ കോട്ടയം സീറ്റു സംബന്ധിച്ചുള്ള ചര്‍ച്ചകളിലാണ് ധാരണയുണ്ടാകാത്തതെന്നാണ് സൂചന.ഒരു പക്ഷെ ഇടതുപ്രവേശനം യാഥാര്‍ത്ഥ്യമാകുകയാണെങ്കില്‍ കോട്ടയത്ത് ഒരു സിപിഎം സ്ഥാനാര്‍ത്ഥി മല്‍സരിക്കാനുള്ള സാധ്യതയും തള്ളിക്കളയാനാകില്ല