ആ 39 പേരുടെ മരണം സ്ഥിരീകരിക്കാനാണോ നാല് വര്‍ഷം കേന്ദ്രസർക്കാർ കാത്തിരുന്നത്‌ ?

ഇറാഖിൽ ഇസ്‍ലാമിക് സ്റ്റേറ്റ് (ഐഎസ്) ഭീകരർ തട്ടിക്കൊണ്ടുപോയ 39 ഇന്ത്യക്കാരും കൊല്ലപ്പെട്ടെന്ന് കഴിഞ്ഞ ദിവസമാണ് സ്ഥിരീകരണമുണ്ടായത്. വിദേശകാര്യമന്ത്രി സുഷമ സ്വരാജ് രാജ്യസഭയിലാണ് ഇക്കാര്യം അറിയിച്ചത്.

ഇവരെ കണ്ടെത്താനുള്ള ശ്രമങ്ങൾ കേന്ദ്രസർക്കാർ നടത്തുന്നതിനിടെയാണു മരണവിവരം പുറത്തുവരുന്നത്. 2014ല്‍ കാണാതായവര്‍ കൊല്ലപ്പെട്ടുവെന്ന് സ്ഥിരീകരിക്കാന്‍ നാലു വര്‍ഷം വേണ്ടി വന്നു. ഇത് ചോദ്യം ചെയ്യപ്പെടുന്നത് ഭരണനേതൃത്വത്തിനുള്ള രാജ്യാന്തര ബന്ധങ്ങളെയും വിവരങ്ങൾ ശേഖരിക്കാനുള്ള സംവിധാനത്തിന്റെ അപകാതയുമാണ്. നാഴികക്ക് നാല്‍പ്പതുവട്ടം വിദേശയാത്ര നടത്തുന്ന പ്രധാനമന്ത്രി എന്തേ ഇക്കാര്യത്തില്‍ വിദേശരാജ്യങ്ങളുടെ സഹായം തേടിയില്ല. 2014 ല്‍ കാണാതായവര്‍ മരണപ്പെട്ടു എന്ന് സ്ഥിരീകരിക്കാന്‍ വേണ്ടി വന്നു നാലു വര്‍ഷം. അത് അവരുടെ ജീവന്‍ സംരക്ഷിക്കാന്‍ ആയിരുന്നുവെങ്കില്‍ ജനങ്ങള്‍ക്കുവേണ്ടി നിലക്കൊള്ളുന്ന സര്‍ക്കാരാണെന്ന കാര്യത്തില്‍ ഭരണത്തില്‍ ഇരിക്കുന്ന കക്ഷിക്ക് അഭിമാനിക്കാമായിരുന്നു.

ഐ എസ് ഭീകരര്‍ തട്ടിക്കൊണ്ട് പോയ ഇവരെ കുറിച്ച് വളരെ കാലങ്ങളായി വിവരങ്ങള്‍ ഒന്നുമില്ലായിരുന്നു. 2014 ജൂണിലാണ് 39 പേരേയും ഐ എസ് മൊസൂളില്‍ നിന്നും തട്ടിക്കൊണ്ട് പോയത്. കൂട്ടശവക്കുഴികളിൽനിന്നാണ് ഇന്ത്യക്കാരുടെ മൃതദേഹങ്ങൾ കണ്ടെത്തിയത്. പഞ്ചാബ് സ്വദേശികളാണ് മരിച്ചവരിലേറെയും.

വിദേശരാജ്യങ്ങളിൽനിന്നു വിവരങ്ങൾ ശേഖരിക്കുന്നതിൽ ഇന്ത്യയുടെ ഇന്റലിജന്‍സ് ഏജൻസി തീർത്തും ദുര്‍ബലമാണെന്നാണ് വ്യക്തമാകുന്നത്. നഴ്സുമാരുടെ കാര്യത്തിൽ ഇന്ത്യയുടെ ശ്രമങ്ങൾ വിജയം കണ്ടപ്പോള്‍ 39 നിർമാണത്തൊഴിലാളികളുടെ കാര്യത്തിൽ പരാജയം സംഭവിച്ചു. അപ്പോള്‍ ഫാദര്‍ ടോം ഉഴന്നാലിന്റെ മോചനം ശരിക്കും എന്തായിരുന്നു. ഫാദറിനെ ബന്ധിയാക്കിയതുകൊണ്ട് രാജ്യത്തിനെക്കൊണ്ടോ, സഭയില്‍ നിന്നോ ഭീകരവാദികള്‍ക്ക് പ്രത്യേകിച്ച് നേട്ടങ്ങള്‍ ഒന്നും തന്നെ ഉണ്ടാവില്ല എന്ന് ബോധ്യപ്പെട്ടതിനാല്‍ അവര്‍ സ്വമേധയ മോചിപ്പിച്ചു എന്ന് വേണം കരുതാന്‍. പക്ഷെ, പൊതുവില്‍ ആ സംഭവം കേന്ദ്രസര്‍ക്കാരിന് ഒരു പൊന്‍തൂവല്‍ ആകുകയും ചെയ്തു. കാര്യങ്ങള്‍ ഇങ്ങനെയെല്ലാം ആണെങ്കില്‍ വിദേശരാജ്യങ്ങളില്‍ തൊഴില്‍ തേടിപ്പോയിരിക്കുന്ന നമ്മുടെ സഹോദരങ്ങള്‍ക്ക് ഒരപകടം ഉണ്ടായാല്‍ എന്തായിരിക്കും സ്ഥിതി. ചിന്തിക്കേണ്ട സമയം അതിക്രമിച്ചു എന്ന് തന്നെ പറയാം.