ഇന്ത്യക്കാർക്ക് യുഎഇയിലേയ്ക്ക് വരാൻ

ഇന്ത്യക്കാർക്ക് സന്ദർശക വീസയിൽ യുഎഇയിലേയ്ക്ക് വരാൻ നിലവിൽ സാധിക്കുമോ എന്ന കാര്യത്തിൽ അവ്യക്തത തുടരുന്നു. യാത്രാ സംബന്ധമായ ഔദ്യോഗിക നടപടികളിൽ വ്യക്തത വരും വരെ യാത്ര സാധ്യമല്ലെന്ന് ഇന്ത്യൻ സ്ഥാനപതി വ്യക്തമാക്കുന്നു. സന്ദർശക വീസയിൽ ഇന്ത്യക്കാർക്ക് യുഎഇയിലേയ്ക്ക് വരാൻ പറ്റുമോ എന്ന് ഇപ്പോൾ പറയാൻ കഴിയില്ല. ഇതിന്റെ വ്യക്തതയ്ക്കായി കാത്തിരിക്കുകയാണ്. ഇന്ത്യൻ സർക്കാരും ഇക്കാര്യത്തിൽ തീരുമാനം കൈക്കൊണ്ടിട്ടില്ല. ഒരു വിമാന കമ്പനിയും വിസിറ്റ് വീസക്കാരെ ഇങ്ങോട്ടു കൊണ്ടുവരുന്നില്ല. അതേസമയം, മലയാളികളടക്കം ഒട്ടേറെ സന്ദർശക വീസക്കാർ കേരളത്തിൽ നിന്നുള്ള മറ്റു വിമാനക്കമ്പനികളുടെ വിമാനങ്ങളിൽ ടിക്കറ്റ് എടുത്തുകഴിഞ്ഞതായി പറയുന്നു.   വന്ദേ ഭാരത് മിഷൻ പദ്ധതിയുടെ ഭാഗമായുള്ള എയർ ഇന്ത്യാ എക്സ്പ്രസ് വിമാനങ്ങളിൽ താമസ വീസക്കാർക്ക് മാത്രമേ യാത്രാ അനുമതിയുള്ളൂ. ജോലി തേടി ഇന്ത്യക്കാരിൽ കൂടുതലും വരാറുള്ളത് സന്ദർശക വീസയിലാണ്. കൂടാതെ, ഒട്ടേറെ കുടുംബങ്ങളും യുഎഇയിലേയ്ക്ക് വരാൻ വേണ്ടി തയ്യാറെടുത്തു കഴിഞ്ഞു. സന്ദർക വീസയിൽ വന്ന് കോവിഡ് ലോക് ഡൗൺ കാരണം കുടുങ്ങി ഒടുവിൽ അധികൃതരുടെ സഹായത്താൽ വന്ദേഭാരത് മിഷൻ വിമാനങ്ങളിൽ മടങ്ങിയവർ ഏറെയാണ്. ഇൗ അവസ്ഥ ഇനിയും ഉണ്ടാകരുതെന്ന് കരുതിയാണ് ഇന്ത്യ നിലവിൽ യാത്ര അനുവദിക്കാത്തതെന്നാണ് കരുതുന്നത്. എന്നാൽ, യാത്ര അനുവദിക്കണമെന്ന് സർക്കാരിനോട് ഇന്ത്യൻ എംബസി ആവശ്യപ്പെട്ടിട്ടുണ്ടെന്നാണ് വിവരം.