ഡിവൈഎഫ്‌ഐ പറയുന്നു ആക്രിയല്ല , അത് നിധിയാണ്

മലയാളി കളയുന്ന ആക്രിക്ക് എന്തു വിലകാണും, ചിന്തിച്ചിട്ടുണ്ടോ, എങ്കില്‍ അറിയണം , നമ്മുളുടെ യുവാക്കള്‍ ഒരുമാസം ആക്രി പെറുക്കുകാരായി മാറി. പത്തു പൈസ നല്‍കരുത് ദുരാശ്വസ നിധിയിലേക്ക് എന്ന് ആഹ്വനം ചെയ്ത ഷാജിമാര്‍ക്കും , ചെന്നിത്തലമാര്‍ക്കും മറുപടിയായി കൈ നിറയെ പണവുമായി അവര്‍ തിരികെ വന്നു. ഡിവൈഎഫ്‌ഐ. കേരളത്തിലെ ഓരോ വീടും കയറിയിറങ്ങി സംഘടനയുടെ പ്രവര്‍ത്തകര്‍ ശേഖരിച്ച പത്രവും, പാട്ടയും കുപ്പിയും വിറ്റ് കിട്ടിയ തുക വലിയൊരു നിധിയായി അവര്‍ കേരള മുഖ്യമന്ത്രിയുടെ ദുരിതാശ്വനിധിയിലേക്ക് നല്‍കി. ഒന്നും രണ്ടും ലക്ഷമല്ല, പത്തുകോടി രൂപയ്ക്ക് മുകളിലാണ് മലയാളികള്‍ സംഭാവനയായി നല്‍കിയ പാഴ്വസ്തുക്കളില്‍ നിന്ന് അവര്‍ നേടിയത്. അതിനൊപ്പം അധ്വാനത്തിന്റെ വിഹിതമുണ്ട്, അതുപോലെ സംഭാവനയായി കിട്ടിയ കലാസൃഷ്ടികളും, ജഴ്സികളും ലേലത്തില്‍ വിറ്റ് നേടിയ പണവുമുണ്ട്. പാഴ്വസ്തുക്കള്‍ ശേഖരിച്ചും അപകടം നിറഞ്ഞ പാറമടയിലുള്‍പ്പെടെ തൊഴിലെടുത്തും യൂണിറ്റ് തലം മുതലുള്ള ചിട്ടയായ സംഘടന പ്രവര്‍ത്തനത്തിലൂടെയുമാണ് കൊവിഡ് പ്രതിരോധത്തിന്റെ ഭാഗമായി ഡിവൈഎഎഫ്ഐ 10.96 കോടി രൂപ സമാഹരിച്ചത്. പാഴ് വസ്തുക്കളും പഴയ പത്രങ്ങളും മാസികകളും ശേഖരിച്ച് വില്‍ക്കുക, ലോക്ക് ആര്‍ട്‌സിലൂടെ നിര്‍മ്മിച്ച ഉത്പന്നങ്ങള്‍ വിപണനം നടത്തുക, പ്രകൃതിവിഭവങ്ങള്‍ ശേഖരിച്ച് വില്‍ക്കുക എന്നൊക്കെയാണ് റീസൈക്കിള്‍ കേരള ക്യാംപെയ്ന്‍ പ്രഖ്യാപിക്കുമ്പോള്‍ ഡിവൈഎഫ്‌ഐ സംസ്ഥാന നേതൃത്വം ലക്ഷ്യമിട്ടത്. എന്നാല്‍ പ്രവര്‍ത്തകരും പൊതുസമൂഹവും ക്യാംപെയിന്‍ ആവേശത്തോടെ ഏറ്റെടുത്തതോടെ ക്യാംപെയിന്റെ വ്യാപതിയും വലുതായി. കായികാധ്വാനത്തിലൂടെയുള്‍പ്പെടെ പണം കണ്ടെത്താന്‍ ഓരോ പ്രവര്‍ത്തകരും മുന്നിട്ടിറങ്ങി. പല ബ്ലോക്ക് കമ്മിറ്റികളും ഇത് മത്സര ബുദ്ധിയോടെ ഏറ്റെടുത്തു. കരിങ്കല്ല് ചുമന്നും ലോഡിങ് നടത്തിയും റോഡ് ടാര്‍ ചെയ്തും വീടും സ്ഥാപനങ്ങളും പെയിന്റിങ് നടത്തിയും കിട്ടുന്ന തുക പ്രവര്‍ത്തകര്‍ സമാഹരിച്ചു. വിവിധ ജലാശയങ്ങളില്‍നിന്നും 6.654 ടണ്‍ പ്ലാസ്റ്റിക് ഉള്‍പ്പെടെയുള്ള മാലിന്യങ്ങളാണ് ശേഖരിച്ച് വില്‍പന നടത്തിയത്. വീടുകളിലും പൊതുസ്ഥലങ്ങളില്‍നിന്നും 1542.7 ടണ്‍ പ്ലാസ്റ്റിക് മാലിന്യങ്ങളും 1519.9 ടണ്‍ ഇരുമ്പ് മാലിന്യങ്ങളും 2102.1 ടണ്‍ പഴയ ദിനപത്രങ്ങളും മാഗസിനുകളും നോട്ട്ബുക്കുകളും ലഭിച്ചു. ഓരോ ജില്ല കമ്മിറ്റികളും ആദ്യഘട്ടം സ്വരൂപിച്ച തുകയ്ക്ക് പുറമേ, സംസ്ഥാനത്തെ കൈത്തറി ശാലകളില്‍ നിന്ന് 90 ലക്ഷം രൂപയുടെ മുണ്ട് വാങ്ങി ബ്ലോക്ക്, മേഖല കമ്മിറ്റി തലങ്ങളില്‍ വീണ്ടും വില്‍പന നടത്തി ലാഭവിഹിതം റീസൈക്കിള്‍ കേരളയിലേക്ക് വകയിരുത്തി.