ദൃശ്യമായത് സൗരകളങ്കങ്ങൾ തന്നെ ; ചിത്രങ്ങൾ പകർത്തി വാനനിരീക്ഷകൻ

കോഴിക്കോട് : രാജ്യാന്തര നിരീക്ഷകർ മുൻകൂട്ടി പറഞ്ഞതുപോലെ സൂര്യനിൽ വീണ്ടും സൗരകളങ്കങ്ങൾ (സൺ സ്പോട്ട്) ദൃശ്യമായി. സമീപ കാലത്തായി ചെറിയ ധാരാളം സൂര്യകളങ്കങ്ങൾ കാണപ്പെട്ടിട്ടുണ്ടെന്നും കഴിഞ്ഞ ഏതാനും ദിവസങ്ങളായി സൂര്യനിൽ കാണപ്പെടുന്ന സൂര്യ കളങ്കം ക്യാമറയിൽ പകർത്തിയ അമച്വർ വാനനിരീക്ഷകൻ സുരേന്ദ്രൻ പുന്നശേരി പറഞ്ഞു.

കോഴിക്കോട് ജില്ലയിലെ കാക്കൂരിലുള്ള നായനുകുന്നു മലയിൽ നിന്ന് സോളർ ഫിൽട്ടർ ഘടിപ്പിച്ച ടെലിഫോട്ടോലെൻസ് ഉപയോഗിച്ചാണു ദൃശ്യം പകർത്തിയത്. സമീപകാലത്ത് പ്രത്യക്ഷപ്പെട്ട ഏറ്റവും വലിയ സൗര കളങ്കങ്ങളിൽ ഒന്നാണിതെന്നും നിരീക്ഷകർ പറഞ്ഞു.

സൂര്യനിൽ കാണപ്പെടുന്ന ഇരുണ്ടതും സമീപപ്രദേശങ്ങളെക്കാൾ തണുത്തതുമായ ഭാഗങ്ങളാണ് സൗരകളങ്കങ്ങൾ. ഇവ സൂര്യനിലെ കാന്തമണ്ഡലവുമായി ബന്ധപ്പെട്ടു കിടക്കുന്നു.

കാന്തമണ്ഡലത്തിലെ ഊർജം പെട്ടന്നു പുറത്തേക്കു വമിക്കുമ്പോൾ പൊട്ടിത്തെറിയുടെ രൂപത്തിൽ സൗരജ്വാലകൾ പുറത്തേക്ക് തെറിക്കും. ഇവയിലെ ചാർജുള്ള കണങ്ങൾ ഭൂമിയുടെ അന്തരീക്ഷത്തിൽ ശക്തമായ സ്വാധീനം ചെലുത്താൽ കഴിയുന്നവയാണ്.