എന്താണ് സി കെ പി ഉള്ളിലിരിപ്പ്

കേരളത്തിലെ ബിജെപി നേതാക്കള്‍ തങ്ങളുടെ ആവതു ശക്തുയുമെടുത്ത് പിണറായി വിജയനെ ആക്രമിക്കുമ്പോള്‍ അദ്ദേഹത്തത്തിന് പിന്‍തുണയുമായി മുതിര്‍ന്ന നേതാവ് രംഗത്ത്.

പദ്ധതികള്‍ യാഥാര്‍ത്ഥ്യമാക്കുന്നതില്‍ മുഖ്യമന്ത്രി പിണറായി വിജയനെ അഭിനന്ദിച്ച് ബിജെപി ദേശീയ നിര്‍വ്വാഹക സമിതിയംഗം സി കെ പത്മനാഭനാണ് വന്നിരിക്കുന്നത്.
ഗെയില്‍ പൈപ്പ് ലൈന്‍, ദേശീയ പാതാ വികസന പദ്ധതികളുമായി ബന്ധപ്പെട്ടാണ് മുഖ്യമന്ത്രിക്ക് മുതിര്‍ന്ന ബിജെപി നേതാവിന്റെ പ്രശംസ. കേരളത്തിന്റെ പശ്ചാത്തല വികസനത്തിന് കരുത്ത് പകരുന്ന ഗെയില്‍ ഗ്യാസ് പൈപ്പ് ലൈന്‍, ദേശിയ പാത വികസനം പദ്ധതികള്‍ യാഥാര്‍ഥ്യമാക്കുന്നതിന് മുഖ്യമന്ത്രി പിണറായി വിജയന്റെ നേതൃത്വപരമായ ഇടപെടല്‍ അഭിനന്ദനം അര്‍ഹിക്കുന്നുവെന്ന് സി കെ പത്മനാഭന്‍ പറഞ്ഞു.

ഗെയില്‍ പദ്ധതി വിജയകരമായി എത്തിച്ചതില്‍ മുഖ്യമന്ത്രിയുടെ വളരെ ശക്തമായ നിലപാട് സ്വാധീനമുണ്ട്. അതിനെ സ്വാഗതം ചെയ്യുകയാണ്. ദേശീയപാതാവികസനം കേന്ദ്രസര്‍ക്കാരിന്റെ അജണ്ടയാണ്.
കേന്ദ്ര ഗതാഗത-ദേശീപാതാ വകുപ്പ് മന്ത്രി നിതിന്‍ ഗഡ്കരിയെ അവിടെ പോയി മുഖ്യമന്ത്രി പിണറായി വിജയന്‍ കാണുകയും, ഗഡ്കരി ഇവിടെ വന്ന് മുഖ്യമന്ത്രിയെ കാണുകയുമെല്ലാം ചെയ്തു. മുഖ്യമന്ത്രിയെയും കേന്ദ്രമന്ത്രിയെയും അഭിനന്ദിക്കണമെന്നും ബിജെപി കുറിപ്പില്‍ പറഞ്ഞു.

ദേശീയ പാതാ വികസനവും ഗെയില്‍ വാതക പെപ്പ് ലൈന്‍ പദ്ധതി പൂര്‍ത്തീകരണവും സര്‍ക്കാരിന് വെല്ലുവിളിയായിരിക്കുമെന്നും അത് അത്ര എളുപ്പമായിരിക്കില്ലെന്നും പറയുന്ന കെ സുരേന്ദ്രന്റെ 2016 മെയിലെ ഫേസ്ബുക്ക് കുറിപ്പ് ഈയിടെ ചര്‍ച്ചയായിരുന്നു. അതിനു പിനനാലെയാണ് തലമുതിര്‍ന്ന നേതാവ് പരസ്യമായ അഭിനന്ദനവുമായി രംഗത്തുവന്നിരിക്കുന്നത്.

സി.കെ.പത്മനാഭന്‍ 2017-ല്‍ ചെഗുവേരയെ ഗാന്ധിജിയോടുപമിച്ച് പുകഴ്ത്തി സംസാരിച്ചത് വിവാദമായിരുന്നു. ക്യൂബന്‍ വിപ്ലവത്തിന് നേതൃത്വം നല്‍കിയ ചെഗുവേരയെ യുവാക്കള്‍ മാതൃകയാക്കണമെന്നും അദ്ദേഹം അന്ന് പറഞ്ഞിരുന്നു. കേരളത്തിലെ അക്രമരാഷ്ട്രീയത്തിന് പ്രചോദനം ചെഗുവേരയാണെന്ന് ബി.ജെ.പി. സംസ്ഥാന ജനറല്‍ സെക്രട്ടറി എ.എല്‍.രാധാകൃഷ്ണന്റെ പ്രസ്താവനയ്ക്ക് മറുപടിയായിട്ടായിരുന്നു പത്മനാഭന്‍ ചെഗുവേരയെക്കുറിച്ച് പറഞ്ഞത്. ഇത് ബി.ജെ.പി. നേതൃത്വത്തെ പ്രതിരോധത്തിലാക്കിയിരുന്നു. ചെഗുവേരയെ വിമര്‍ശിക്കുന്നവര്‍ അദ്ദേഹത്തെ പഠിക്കണമെന്നും 'ബൊളീവിയന്‍ ഡയറി' വായിക്കണമെന്നും അദ്ദേഹം അന്നുപറഞ്ഞു. പത്മനാഭന്റെ ചെഗുവേര അനുകൂലപ്രസ്താവന അദ്ദേഹം സി.പി.എമ്മിലേക്ക് പോകുകയാണെന്ന പ്രചാരണം വരെയുണ്ടാക്കി.
ബിജെപി ഗ്രൂപ്പ് പോര് സജീവമായി നില്‍ക്കുന്ന സമയത്താണ് മുന്‍ സംസ്ഥാന പ്രസിഡന്റിന്റെ രംഗപ്രവേശം. അണികള്‍ വളരെ കൗതകത്തോടെ യാണ് ഈ നീക്കത്തെ കാണുന്നത്. ബി ജെപി യില്‍ സജീവമാവുകയാണോ അതോ മറ്റെന്തെങ്കിലും ലക്ഷ്യമുണ്ടോ എന്ന സംശയവും അവര്‍ ഗ്രൂപ്പുകളില്‍ പ്രകടിപ്പിച്ചു തുടങ്ങിക്കഴിഞ്ഞു.