കർഷകരെ അടിയന്തര ചർച്ചയ്ക്ക് വിളിച്ച് : അമിത് ഷാ

വിവാദ കർഷക നിയമങ്ങൾക്കെതിരെ സമരം രൂക്ഷമാകുന്നതിനിടെ കർഷകരെ അടിയന്തര ചർച്ചയ്ക്ക് വിളിച്ച് കേന്ദ്ര ആഭ്യന്തരമന്ത്രി അമിത് ഷാ. ചൊവ്വാഴ്ച വൈകിട്ട് ഏഴുമണിക്കാണ് ചർച്ച. ബുധനാഴ്ച ആറാം തവണ കർഷകരുമായി കേന്ദ്ര സർക്കാർ ചർച്ച നടത്താനിരിക്കെയാണ് അമിത് ഷാ യോഗം വിളിച്ചത്. ഡൽഹിയിൽ സമരം നടത്തുന്ന കർഷക നേതാവ് രാകേഷ് ടിക്കായതിനെയാണ് ഇന്ന് ഏഴുമണിക്ക് ചർച്ചയ്ക്ക് എത്തണമെന്ന് അമിത് ഷാ അറിയിച്ചത്. യോഗത്തിൽ കർഷക നേതാക്കൻമാർ പങ്കെടുത്തേക്കും.

മൂന്നു നിയമങ്ങളും പിൻവലിക്കുക എന്നതിൽ കുറഞ്ഞൊന്നും അംഗീകരിക്കാൻ തയാറാകില്ലെന്ന നിലപാടിൽ തന്നെയാണ് കർഷകർ. അതേസമയം എട്ട് സംഘടനാ നേതാക്കളെ മാത്രം ചർച്ചയ്ക്ക് വിളിച്ചതിനെതിരെ കർഷക സംഘടനകൾക്കിടയിലും അമർഷമുണ്ട്. കർഷകസമര നേതാക്കളെ ഭിന്നിപ്പിക്കാനുള്ള തന്ത്രത്തിന്റെ ഭാഗമാണിതെന്നും ആരോപണം ഉയർന്നിട്ടുണ്ട്.