ഓര്‍ഡിനറി ബസുകളിലെ സെസ് ഒഴിവാക്കി

തിരുവനന്തപുരം: കെ.എസ്.ആര്‍.ടി.സിയുടെ എല്ലാ ഓര്‍ഡിനറി സര്‍വിസുകളിലും 49 രൂപവരെയുള്ള ടിക്കറ്റുകളില്‍ ഈടാക്കിയിരുന്ന പാസഞ്ചര്‍ സെസ് തുക ഒഴിവാക്കി. 47.9 കിലോമീറ്റര്‍ വരെയുള്ള ദൂരപരിധിയിലുള്ള സഞ്ചാരത്തിനാണ് സെസ് ഒഴിവാക്കിയത്. സി.എം.ഡിയുടെ ആവശ്യം അനുസരിച്ചാണ് ഇതെന്ന് ഗതാഗതമന്ത്രി എ.കെ. ശശീന്ദ്രന്‍ പറഞ്ഞു.

ആറു മാസത്തേക്ക് പരീക്ഷണാടിസ്ഥാനത്തിലാണ് നടപടി. ടിക്കറ്റ് നിരക്ക് കുറക്കുമ്പോള്‍ കൂടുതല്‍ യാത്രക്കാരെ ആകര്‍ഷിക്കാനാകുമെന്നാണ് കെ.എസ്.ആര്‍.ടി.സിയുടെ പ്രതീക്ഷ. ഇക്കാര്യം മാനേജ്‌മെന്റ് സര്‍ക്കാറിനെയും അറിയിച്ചിരുന്നു. ഇതുമൂലമുണ്ടാകുന്ന നഷ്ടം പ്രത്യേക നിരക്കില്‍ നടത്തുന്ന മറ്റ് ബോണ്ട് സര്‍വിസുകളില്‍ കൂടി പരിഹരിക്കാന്‍ കഴിയുമെന്നുമാണ് വിലയിരുത്തല്‍. ഇതിന്റെ അടിസ്ഥാനത്തിലാണ് ഉത്തരവ്. ടിക്കറ്റ് ചാര്‍ജ് വര്‍ധന നിലവില്‍ വന്ന ശേഷം 6.49 കോടി രൂപ സെസ് ഇനത്തില്‍ ലഭിച്ചിട്ടുണ്ട്.