കൊച്ചിയില്‍ ഡിജെ പാര്‍ട്ടികള്‍ എതിര്‍ക്കില്ല: സിറ്റി പൊലീസ് കമ്മീഷണര്‍

കൊച്ചി: പുതുവത്സരത്തില്‍ കൊച്ചി നഗരത്തില്‍ ഡിജെ പാര്‍ട്ടികള്‍ നടത്തുന്നതില്‍ തടസമില്ലെന്ന് കൊച്ചി സിറ്റി പൊലീസ് കമ്മീഷണര്‍ വിജയ് സാഖറെ അറിയിച്ചു. എന്നാല്‍ കോവിഡ് പ്രോട്ടോക്കോള്‍ കൃത്യമായി പാലിക്കണം. 'ലഹരി ഉപയോഗം നടക്കുന്നുണ്ടോ എന്ന് അറിയാന്‍ പൊലീസിന്റെ കര്‍ശന നിരീക്ഷണം ഉണ്ടായിരിക്കും, ഏതു സമയത്തു വേണമെങ്കിലും പരിശോധന നടത്താന്‍ പൊലീസിനു സാധിക്കും' കമ്മീഷണര്‍ അറിയിച്ചു.

ഹൈറേഞ്ച് കേന്ദ്രീകരിച്ചു നടത്തുന്ന നിശാപാര്‍ട്ടികള്‍ക്ക് കര്‍ശന നിയന്ത്രണം ഉണ്ട്. ഇവിടെ പൊലീസ് വകുപ്പിന്റെ നേതൃത്വത്തില്‍ എക്സൈസ് വകുപ്പിന്റെ സഹായത്തോടെ നാളെ രാവിലെ മുതല്‍ കര്‍ശന പരിശോധന ഉണ്ടായിരിക്കും. ഇടുക്കി ജില്ലയില്‍ റിസോര്‍ട്ട് കേന്ദ്രീകരിച്ച് ലഹരി ഒഴുക്ക് ഉണ്ടാകുമെന്ന് എക്സൈസ് ഇന്റലിജന്‍സ് നേരത്തെ റിപ്പോര്‍ട്ട് ചെയ്തിരുന്നു. നിയമലംഘനം ശ്രദ്ധയില്‍പ്പെട്ടാല്‍ കര്‍ശന നടപടികള്‍ ഉണ്ടായിരിക്കുമെന്നും ജില്ലാ ഭരണകൂടം അറിയിച്ചിരുന്നു. കഴിഞ്ഞ ദിവസങ്ങളില്‍ ഹൈറേഞ്ച് മേഖലകളില്‍ വലിയ തോതില്‍ ലഹരി മരുന്നുകള്‍ പിടികൂടിയിരുന്നു.