പുരയ്ക്കു തീപിടിച്ചാലെന്താ, ബിജെപി എംഎല്‍എയ്ക്ക് സെല്‍ഫിയെടുക്കണം

തീ ആളിപ്പടരുന്നതിനിടയില്‍ ബിജെപി എം എല്‍ എയുടെ സെല്‍ഫി.രാജസ്ഥാനിലെ ഭരത്പൂരില്‍ നിന്നുള്ള ബിജെപി എംഎല്‍എ ബച്ചു ബന്‍സ്വാളാണ് ഈ സാഹസത്തിനു മുതിര്‍ന്നത്.സെല്‍ഫിഎടുക്കുക മാത്രമല്ല ഫോട്ടോ ഫേസ് ബുക്കില്‍ പോസ്റ്റ് ചെയ്യുകയും കൂടി ചെയ്തതോടെ സംഭവം വിവാദമായി.എന്നാല്‍ തീയണയ്ക്കാന്‍ സഹായമഭ്യര്‍ത്ഥിക്കും മുന്‍പാണ് സെല്‍ഫി എടുക്കാന്‍ നിയമസഭാഗം മുതിര്‍ന്നതെന്നാണ് കണ്ടു നിന്നവര്‍ പറഞ്ഞത്.

ഭരത്പൂരിലെ ബയാനയില്‍ ഒരു വീടിന് തീ ആളിപ്പടരുന്നെന്ന വാര്‍ത്തയറിഞ്ഞ എംഎല്‍എ ഓടിപ്പിടിച്ചവിടെ എത്തിയാണ് സെല്‍ഫി എടുത്തത്.ഇതു കണ്ട് ഞെട്ടിയ ആളുകള്‍ ആ സമയത്ത് ഒരക്ഷരം പോലും പ്രതികരിച്ചില്ല.എന്നാല്‍ താന്‍ ഔദ്യോഗികമായി മാത്രമാണ് ചിത്രമെടുത്തതെന്നും ഉദ്യോഗസ്ഥര്‍ക്ക് ഇതു സംബന്ധിച്ച് വിവരം കൈമാറുന്നതിനുമായിരുന്നെന്നാണ് എം എല്‍ എയുടെ വാദം.സംഭവം വിവാദമായതോടെ ഫേസ് ബുക്ക് പേജില്‍ നിന്നും എംഎല്‍എ ഫോട്ടോ ഡിലീറ്റ് ചെയ്തിരുന്നു.