വാളയാര്‍ പെണ്‍കുട്ടികളുടെ മരണം ആത്മഹത്യ:കുട്ടികളുടെ ബന്ധുക്കളടക്കം നാലു പ്രതികള്‍,കുറ്റപത്രം സമര്‍പ്പിച്ചു

വാളയാറില്‍ സഹോദരിമാരായ പെണ്‍കുട്ടികള്‍ ദുരൂഹ സാഹചര്യത്തില്‍ മരിച്ച സംഭവത്തില്‍ പെണ്‍കുട്ടികളുടെ ബന്ധുക്കളടക്കം നാലുപേര്‍ക്കെതിരെ കുറ്റപത്രം സമര്‍പ്പിച്ചു.രണ്ടു കേസുകളിലായി നാലു പ്രതികള്‍ക്കെതിരെയാണ് കുറ്റപത്രം.കുറ്റം ചുമത്തപ്പെട്ടവര്‍ക്കെതിരെ ആത്രമഹത്യാ പ്രേരണ കുറ്റം കൂടാതെ പോസ്‌കോ നിയമപ്രകാരവും കേസ് രജിസ്റ്റര്‍ ചെയ്തിട്ടുണ്ട്.എന്നാല്‍ പെണ്‍കുട്ടികള്‍ ആത്മഹത്യ ചെയ്തത് തന്നെയാണെന്നാണ് കുറ്റപത്രത്തില്‍ പറയുന്നത്.

പെണ്‍കുട്ടികളുടെ അമ്മയുടെ ബന്ധുക്കളായ പാമ്പാംപള്ളം കല്ലങ്കാട്ട് എം മധു(27)വി.മധു(27),അച്ഛന്റെ സുഹൃത്ത് ഇടുക്കി രാജാക്കാട് സ്വദേശി വലിയമുല്ലക്കാനം നാലുതലയ്ക്കല്‍ ഷിബു(43),അയല്‍വാസിയും ട്യൂഷന്‍ അധ്യാപകനുമായ പ്രദീപ്കുമാര്‍(34)എന്നിവരാണ് പ്രതികള്‍.

പെണ്‍കുട്ടികളുടെ ആത്മഹത്യയില്‍ നേരത്തേ മനുഷ്യാവകാശ കമ്മീഷന്‍ പൊലീസിനോട് റിപ്പോര്‍ട് തേടിയിരുന്നു.സഹോദരിമാരുടെ മരണം ആത്മഹത്യ തന്നെയാണെന്ന് പൊലീസ് മേധാവി മനുഷ്യാവകാശ കമ്മീഷനില്‍ അറിയിച്ചിരുന്നു.പതിമൂന്നുകാരിയായ മൂത്തസഹോദരി ജനുവരി 14 നും ഇളയ സഹോദരി മാര്‍ച്ച് 9നുമാണ് ഓടും ഷീറ്റും മേഞ്ഞ വീടിന്റെ ഉത്തരത്തില്‍ എട്ടടി ഉയരത്തില്‍ തൂങ്ങി മരിച്ച നിലയില്‍ കാണപ്പെട്ടത്.പെണ്‍കുട്ടികള്‍ ഇരുവരും മരണത്തിനു മുന്‍പ് പീഡിപ്പക്കപ്പെട്ടതായി പോസ്റ്റുമോര്‍ട്ടം റിപ്പോര്‍ട്ടുണ്ട്.തുടര്‍ന്നുള്ള അന്വേഷണത്തിലാണ് നാലു പേരേ പൊലീസ് കസ്റ്റഡിയിലെടുത്തത്