പള്‍സര്‍ സുനിയുടെ സഹതടവുകാരനും ദിലീപിന്റെ മാനേജരുമായുള്ള ഫോണ്‍ സംഭാഷണം പുറത്ത്

ഓടുന്ന വാഹനത്തില്‍ നടി ആക്രമിക്കപ്പെട്ട സംഭവവുമായി ബന്ധപ്പെട്ട് നടന്‍ ദിലീപിനെ ബ്ലാക്ക്‌മെയില്‍ ചെയ്യാന്‍ ശ്രമിച്ച വിഷ്ണുവിന്റെ ഫോണ്‍ സംഭാഷണം പുറത്തു വന്നു.കേസിലെ മുഖ്യപ്രതിയായ പള്‍സര്‍ സുനിയുടെ സഹതടവുകാരനായ വിഷ്ണു ദിലീപിന്റെ മാനേജര്‍ അപ്പുണ്ണിയെ ഫോണില്‍ വിളിച്ച് തനിക്ക് പറയാനുള്ളതെല്ലാം കേള്‍ക്കണമെന്നും ജയിലില്‍ നിന്നാണ് വിളിക്കുന്നതെന്നും അപ്പുണ്ണിയോട് പറയുന്നുണ്ട്.ഈ സംഭാഷണത്തില്‍ പള്‍സര്‍ സുനി കൊടുത്തയച്ച കത്ത് വായിക്കണമെന്നും അപ്പുണ്ണിയോട് വിഷ്ണു ആവശ്യപ്പെടുന്നുണ്ട്. എന്നാല്‍ തന്നെ മേലാല്‍ വിളിക്കരുതെന്നും എന്താണെന്നു വെച്ചാല്‍ ചെയ്‌തോളാനും വേണമെങ്കില്‍ പൊലീസില്‍ പരാതിപ്പെട്ടോളാനും അപ്പുണ്ണി വിഷ്ണുവിനോട് പറയുന്നതായുള്ള സംഭാഷണമാണ് പുറത്തു വരുന്നത്. അതിനിടയില്‍ ബ്ലാക്ക് മെയില്‍ ചെയ്ത് പണെം തട്ടിയെടുക്കാന്‍ ശ്രമിച്ചെന്ന കേസില്‍ വിഷ്ണുവിനെ പൊലീസ് കസ്റ്റഡിയിലെടത്തിട്ടുണ്ട്.

അതേസമയം, പൾസർ സുനി എഴുതിയതെന്ന പേരിൽ പ്രചരിക്കുന്ന കത്ത് ദിലീപിനെത്തിച്ചത് വിഷ്ണുവാണ്. നടിയെ ആക്രമിക്കാൻ ക്വട്ടേഷൻ നൽകിയതു നടൻ ദിലീപാണെന്നു പൊലീസിനോടും മാധ്യമങ്ങളോടും വെളിപ്പെടുത്താൻ പൾസൾ സുനിക്കു വൻതുക വാഗ്ദാനം ലഭിച്ചതായാണ് വിഷ്ണുവിന്റെ വെളിപ്പെടുത്തൽ. അപ്പുണ്ണിയെ കൂടാതെ ദിലീപിന്റെ അടുത്ത സുഹൃത്തും സംവിധായകനുമായ നാദിർഷായേയും ഇതേ കാര്യവുമായി ബന്ധപ്പെട്ട് വിഷ്ണു ഫോണിൽ ബന്ധപ്പെട്ടിരുന്നു. അതേസമയം, വിഷ്ണുവിനെ നേരിൽ കണ്ടിട്ടില്ലെന്നാണ് നാദിർഷായുടെ പ്രതികരണം. അപ്പുണ്ണിയോടും നാദിർഷായോടും എട്ടു തവണ വിഷ്ണു ഫോണിൽ സംസാരിച്ചിട്ടുണ്ട്. ഈ സംഭാഷണങ്ങളെല്ലാം റെക്കോർഡ് ചെയ്ത് ദിലീപ് പരാതിക്കൊപ്പം പൊലീസിനു നൽകിയിരുന്നു.