ഇന്ന് ഒരു പാട് സന്തോഷം”. ഇനി അത് ആര്‍ക്കെങ്കിലും……

CN രമ്യ(കൃഷിജാഗരണ്‍ കോട്ടയം)

''ഇല്ല, ഞാന്‍ മരിക്കുവോളം ആര്‍ക്കും അത് വിട്ടുകൊടുക്കില്ല. ആര് ചോദിച്ചാലും കൊടുക്കുകയുമില്ല'' - മെത്രാന്‍കായല്‍ ഹീറോ കരുണാകരന്‍ ചേട്ടന്റെ വാക്കുകള്‍. ഇത് വെറും വാക്കല്ല. വൃദ്ധകര്‍ഷകന്റെ ഉറച്ച തീരുമാനം. കൃഷിമന്ത്രി വി. എസ്. സുനില്‍ കുമാറിന്റെ കൈകളില്‍ നിന്നും മെത്രാന്‍ അരി ഏറ്റുവാങ്ങിയപ്പോള്‍ 92 -ാം വയസിലും ആ കണ്ണുകളില്‍ തിളക്കം. ആ തീരുമാനത്തിന്റെ വിജയമാണ് വ്യാഴാഴ്ച കോട്ടയത്ത് നടന്ന മെത്രാന്‍കായല്‍ ബ്രാന്‍ഡഡ് റൈസ് വിപണനോദ്ഘാടനം.

ഈ കര്‍ഷകന്റെ ദൃഢനിശ്ചയത്തിന്റെ പ്രചോദനമേറ്റുവാങ്ങിയാണ് എട്ട് വര്‍ഷം തരിശായി കിടന്ന മെത്രാന്‍ കായല്‍ പാടശേഖരം കതിരണിഞ്ഞത്.

ഓയില്‍ പാം ഇന്ത്യയുടെ വെച്ചൂര്‍ മോഡേണ്‍ റൈസ് മില്ല് സംഭരിച്ച 356.3 മെട്രിക് ടണ്‍ നെല്ലാണ് അരിയായി വിപണിയിലെത്തിയത്. അഞ്ച് കിലോ, പത്ത് കിലോ പായ്ക്കറ്റുകളില്‍ വിപണിയില്‍ നിന്നും അരി ലഭിക്കും. വെച്ചൂര്‍ മില്ലില്‍ നിന്നും നേരിട്ടും അരി വാങ്ങാവുന്നതാണ്.

കുമരകത്തിന്റെ തരിശ് നിലങ്ങള്‍ കൃഷിയോഗ്യമാക്കുകയെന്ന ലക്ഷ്യത്തോടെ നിരവധി വെല്ലുവിളികള്‍ അതിജീവിച്ച് ജനകീയകൂട്ടായ്മയിലൂടെയുമാണ് നെല്‍കൃഷി വീണ്ടെടുത്തത്.

തിരുനക്കര ബാങ്ക് എംപ്ലോയീസ് ഹാളില്‍ നടന്ന ചടങ്ങില്‍ തിരുവഞ്ചൂര്‍ രാധാകൃഷ്ണന്‍ എം.എല്‍.എ അധ്യക്ഷനായി. സുരേഷ് കുറുപ്പ് എം.എല്‍.എ മുഖ്യ പ്രഭാഷണം നടത്തി. കളക്ടര്‍ സി.എ. ലത IAS, പി.എ.ഒ. സുമ ഫിലിപ്പ്, ജനപ്രതിനിധികള്‍, കര്‍ഷകര്‍, കൃഷി വകുപ്പ് ഉദ്യോഗസ്ഥര്‍ തുടങ്ങിയവര്‍ പങ്കെടുത്തു