അമ്മ ‘മാപ്പു’ ചോദിയ്ക്കുന്നു:മുകേഷും ഗണേഷും പ്രതികരിച്ചത് വികാര വിക്ഷോഭത്താല്‍

കഴിഞ്ഞ ദിവസം കൊച്ചിയില്‍ നടന്ന അമ്മയുടെ ജനറല്‍ ബോഡി മീറ്റിംഗിനു ശേഷം വിളിച്ചു കൂട്ടിയ പത്രസമ്മേളനത്തില്‍ മുകേഷും ഗണേശും പെട്ടന്നുണ്ടായ വികാര വിക്ഷോഭത്താലാണ് പൊട്ടിത്തെറിച്ചതെന്നും സംഭവത്തില്‍ മാപ്പ് ചോദിയ്ക്കുന്നെന്നും അമ്മയുടെ പ്രസിഡന്റ് ഇന്നസെന്റ്.മുന്‍കൂട്ടി തയ്യാറാക്കിയതല്ല അവരുടെ പ്രതികരണം,പെട്ടന്നുണ്ടായ പ്രതികരണത്താലാണ് പൊട്ടിത്തെറിച്ചത്.ആവേശം കൊണ്ടാണ് ഇരുവരും ബഹളം വെച്ചത്.ഇത് സംഘനടയുടെ പ്രതിച്ഛായയ്ക്ക് കളങ്കമുണ്ടാക്കിയതായും ഇന്നസെന്റ് പറഞ്ഞു

ചലച്ചിത്ര താരങ്ങളുടെ ക്ഷേമത്തിനു വേണ്ടിയാണ് സംഘടന രൂപീകരിച്ചിരിക്കുന്നത്.ചിലരുടെ പരാമര്‍ശങ്ങള്‍ സംഘടനയ്ക്ക് തീരാക്കളങ്കമുണ്ടാക്കി.സംഘടന പിരിച്ചു വിടണമെന്ന ഗണേശിന്റെ കത്തും മനോവിഷമമുണ്ടാക്കി.ചില കാര്യങ്ങള്‍ നടപ്പാക്കാത്തതിനാ.ണ് ഗണേശ് കത്തു നല്‍കിയത്.കത്തില്‍ സൂചിപ്പിച്ച കാര്യങ്ങളില്‍ കഴമ്പുണ്ടെന്നും ഇന്നസെന്റ് കൂട്ടിച്ചേര്‍ത്തു

അമ്മയോഗത്തില്‍ നടിയുടെ നേരേ നടന്ന ആക്രമണം ചര്‍ച്ചയാകാതിരുന്നത് കോടതിയുടെ പരിഗണനയിലിരിക്കുന്ന വിഷയമായതുകൊണ്ടാണെന്നും അമ്മ എന്നും ആക്രമണത്തിനിരയായ നടിക്കൊപ്പമാണെന്നും ഇന്നസെന്റ് പറഞ്ഞു.നടന്‍ ദിലീപിനോട് ഇക്കാര്യത്തേക്കുറിച്ച് ചോദിച്ചപ്പോള്‍ താന്‍ തെറ്റൊന്നും ചെയ്തിട്ടില്ലെന്നും സത്യം പുറത്തുവരണമെന്നാണ് തന്റെയും ആഗ്രഹമെന്നും പറഞ്ഞതായും ഇന്നസെന്റ് പറഞ്ഞു.ദിലീപ് തന്റെ മറ്റ് സുഹൃത്തുക്കളോടും ഇതു തന്നെയാണ് പറഞ്ഞതെന്നാണ് അറിയാന്‍ കഴിഞ്ഞത്.

പിന്നെ കഴിവുള്ള സ്ത്രീകള്‍ അമ്മയുടെ നേതൃത്വത്തില്‍ വരണമെന്നു തന്നെയാണ് ആഗ്രഹമെന്നും അല്ലാതെ സംവരണത്തിലൂടെ ആരേയും നേതൃത്വത്തിലുള്‍പ്പെടുത്തില്ലെന്നും ഇന്നസെന്റ് പറഞ്ഞു. അക്രമത്തിനിരയായ നടിയുടെ പേര് എല്ലാവര്‍ക്കുമറിയാം,എന്നാല്‍ അത് പറയുന്നത് നിയമത്തിന് എതിരാണെന്നും അദ്ദേഹം കൂട്ടിച്ചേര്‍ത്തു.