വൈരാഗ്യത്തിന് കാരണം കാവ്യയുമായുള്ള ബന്ധം നടി പ്രചരിപ്പിച്ചതിനാല്‍ ; നടിയുടെ മൂന്ന് മിനിറ്റ് ദൃശ്യത്തിന് വാഗ്ദാനം ചെയ്‌തത്‌ ഒന്നരകോടി

ദിലീപിന് നടിയോട് വൈരാഗ്യം ഉണ്ടാകാന്‍ കാരണം വിവാഹ ബന്ധത്തില്‍ വിള്ളല്‍ വീഴ്ത്തിയതും കാവ്യയുമായുള്ള ബന്ധം പ്രചരിപ്പിച്ചതുമാണ് എന്ന് റിപ്പോര്‍ട്ട്. ക്വട്ടേഷന്‍ നല്‍കാനുള്ള ഗൂഡാലോചന പള്‍സര്‍ സുനിയുമായി നേരിട്ട് നടത്തിയ ദിലീപ് 2013 ല്‍ അബാദ്‌ പ്‌ളാസാ ഹോട്ടലിലും സ്വന്തം ബിഎംഡബ്‌ള്യൂ കാറിലും ഗൂഡാലോചന നടത്തിയെന്നാണ് പോലീസ് പറയുന്നത്.

നടിയുടെ വെറും മൂന്ന് മിനിറ്റ് ദൈര്‍ഘ്യം വരുന്ന ദൃശ്യത്തിനായി ദിലീപ് സുനിക്ക് ഒന്നരകോടി വാഗ്ദാനം ചെയ്‌തെന്നും ക്വട്ടേഷനുള്ള അഡ്വാന്‍സായി പതിനായിരം രൂപയും നല്‍കി. നടിയുടെ ചിരിക്കുന്ന മുഖവും വിവാഹ നിശ്ചയ മോതിരവും ദൃശ്യങ്ങളില്‍ വരണമെന്ന് ദിലീപ് ശഠിച്ചതായും റിപ്പോര്‍ട്ടിലുണ്ട്. നടിയുടെ അവസരം ഇല്ലാതാക്കുന്നത് ഉള്‍പ്പെടെയുള്ള പ്രവര്‍ത്തനങ്ങള്‍ക്ക് പിന്നില്‍ ദിലീപ് ആയിരുന്നെന്ന് സിനിമാ വേദിയിലെ പലരും വെളിപ്പെടുത്തുകയും ചെയ്തിരുന്നു.

സുനിലും ദിലീപും 2013 മുതല്‍ പരിചയത്തിലായിരുന്നു എന്നും പോലീസ് കണ്ടെത്തിയിട്ടുണ്ട്. 2013 അമ്മാ ഷോയുടെ റിഹേഴ്‌സലിനിടയിലായിരുന്നു ഇരുവരും ആദ്യം കൂടിക്കാഴ്ച നടത്തിയത്. ദിലീപ് മഴവില്ലഴകില്‍ അമ്മ എന്ന പരിപാടിക്ക് ദിലീപ് സുനിക്ക് വിഐപി പാസ് നല്‍കിയിരുന്നതായും കണ്ടെത്തിയിട്ടുണ്ട്. കത്ത് പുറത്തു വന്നതിന് പിന്നാലെ സുനിയെ അറിയില്ലെന്ന നിലപാടായിരുന്നു നടന്‍ എടുത്തത്. എന്നാല്‍ ജോര്‍ജേ്ജട്ടന്‍സ് പൂരം എന്ന സിനിമയുടെ സെറ്റില്‍ നിന്നുള്ള താരത്തിന്റെ സെല്‍ഫിയില്‍ സുനിയെ കണ്ടെത്തിയതോടെ എല്ലാം മറിഞ്ഞു. ദിലീപിനെയും പള്‍സര്‍ സുനിയെയും ബന്ധിപ്പിക്കുന്ന 19 തെളിവുകള്‍ കണ്ടെത്തുകയായിരുന്നു.