ഓണം വാരാഘോഷത്തിന് തുടക്കം

തിരുവനന്തപുരം: സംസ്ഥാന ടൂറിസം വകുപ്പ് തിരുവനന്തപുരത്ത് സംഘടിപ്പിക്കുന്ന ഓണം വാരാഘോഷത്തിന്റെ ഉദ്ഘാടനം നിശാഗന്ധി ഓഡിറ്റോറിയത്തില്‍ മുഖ്യമന്ത്രി പിണറായി വിജയന്‍ നിര്‍വഹിച്ചു. ദൈവത്തിന്റെ സ്വന്തം നാടെന്ന കേരളത്തിന്റെ പേര് എവിടെയൊക്കെയോ നഷ്ടപ്പെടുന്നുണ്ടെന്ന് മുഖ്യമന്ത്രി ചൂണ്ടിക്കാട്ടി. കഴിഞ്ഞ വര്‍ഷം ഉണ്ടായ കൊടുംവേനല്‍ ഇതിന്റെ തുടക്കമാണ്. നമ്മുടെ നദികളില്‍ വെള്ളമില്ലാതായിരിക്കുന്നു. കേരളത്തിന്റെ ഹരിതാഭയും മങ്ങിതുടങ്ങിയിരിക്കുന്നു. ഇത് തിരിച്ച് പിടിക്കണം. ദൈവത്തിന്റെ സ്വന്തം നാടെന്ന ഖ്യാതി തിരിച്ചുകിട്ടാന്‍ എല്ലാവരും ഒരുമിച്ച് പ്രവര്‍ത്തിക്കണമെന്നും അദ്ദേഹം ആവശ്യപ്പെട്ടു.

ചടങ്ങില്‍ ചലച്ചിത്ര താരം മമ്മൂട്ടി മുഖ്യാതിഥിയായിരുന്നു. ഓണദിനങ്ങള്‍ എല്ലാ ദിവസവും ഉണ്ടാകണമെന്ന് അദ്ദേഹം തന്റെ പ്രസംഗത്തില്‍ ആവശ്യപ്പെട്ടു. ഓണമെന്ന് താന്‍ ഉദ്ദേശിച്ചത് അവധിയെടുത്ത് ആഘോഷിക്കലല്ല. മറിച്ച് മഹാബലി ഭരിച്ച ദിവസങ്ങളുടെ നന്മ തിരിച്ച് പിടിക്കലാണെന്നും അദ്ദേഹം പറഞ്ഞു. രാജ്യം നമുക്ക് എന്ത് ചെയ്തു തന്നു എന്ന് ചിന്തിക്കാതെ നമ്മള്‍ രാജ്യത്തിന് വേണ്ടി എന്ത് ചെയ്യുന്നു എന്ന് ചിന്തിക്കണമെന്നും അദ്ദേഹം ആവശ്യപ്പെട്ടു.

ഇന്ന് മുതല്‍ സെപ്തംബര്‍ ഒമ്ബത് വരെ ജില്ലയിലെ 30 വേദികളിലായാണ് ഓണം വാരാഘോഷം സംഘടിപ്പിക്കുക. സമാപന ദിവസം ഓണം ഘോഷയാത്ര നടത്തും