ആഡംബരക്കാര്‍ രജിസ്‌ട്രേഷനില്‍ നികുതി വെട്ടിപ്പ്, അമല പോളിനും ഫഹദിനുമെതിരെ ആരോപണം

നടി അമലാപോളും നടന്‍ ഫഹദ് ഫാസിലും ആഡംബരക്കാര്‍ രജിസ്‌ട്രേഷന്‍ മറവില്‍ ലക്ഷങ്ങള്‍ നികുതി വെട്ടിപ്പു നടത്തിയതായി ആരോപണം.

ഫഹദ് ഫാസില്‍ വ്യാജമേല്‍വിലാസം ഉപയോഗിച്ച് ആഡംബര കാര്‍ പുതുച്ചേരിയില്‍ രജിസ്റ്റര്‍ ചെയ്തിട്ടുള്ളതായി മാതൃഭൂമി ന്യൂസ് നടത്തിയ അന്വേഷണത്തില്‍ കണ്ടെത്തി. താരത്തിന്റെ 70 ലക്ഷം രൂപ വിലയുള്ള ബെന്‍സ് കാര്‍ പോണ്ടിച്ചേരിയില്‍ രജിസ്റ്റര്‍ ചെയ്തത് വഴി സര്‍ക്കാര്‍ ഖജനാവിന് 14 ലക്ഷം രൂപ നഷ്ടമുണ്ടായെന്ന് മാതൃഭൂമി ന്യൂസ് റിപ്പോര്‍ട്ട് ചെയ്യുന്നു. ലേസ് പോര്‍ട്ടിലെ വീടിന്റെ മുകളിലത്തെ നിലയുടെ വിലാസത്തിലാണ് രജിസ്ട്രേഷന്‍ നടത്തിയിരിക്കുന്നത്. എന്നാല്‍ ഫഹദിനെ അറിയില്ലെന്ന് വീട്ടുടമ പറഞ്ഞു.

അന്വേഷണത്തില്‍ ഫഹദ് ഫാസില്‍ ഉപയോഗിക്കുന്ന PY-05-9899 ആഡംബര കാര്‍ ബെന്‍സ് ഇ പുതുച്ചേരി വിലാസത്തിലാണ് രജിസ്റ്റര്‍ ചെയ്തിട്ടുള്ളതെന്ന് കണ്ടെത്തി. ഫഹദ് ഫാസില്‍, നമ്പര്‍ -16, സെക്കന്‍ഡ് ക്രോസ്സ് റോഡ്, പുതുപ്പേട്ട്, ലാസ്പേട്ട്, പുതുച്ചേരി എന്ന മേല്‍വിലാസത്തിലാണ് വാഹനം രജിസ്റ്റര്‍ ചെയ്തിട്ടുള്ളത്. ആംഡബര കാറുകള്‍ രജിസ്റ്റര്‍ ചെയ്യുവാന്‍ കേരളത്തില്‍ പതിനാല് ലക്ഷം രൂപ നികുതി നല്‍കേണ്ടി വരുമ്പോള്‍ പുതുച്ചേരിയില്‍ ഒന്നരലക്ഷം രൂപ നല്‍കിയാല്‍ മതി.

സമാനമായ ആരോപണത്തില്‍ , അമലയുടെ മെഴ്സിഡസ് ബെന്‍സ് കാര്‍ രജിസ്‌ട്രേഷന്റെ മറവില്‍ പോണ്ടിച്ചേരിയിലെ ഒരു എന്‍ജിനീയറിങ് വിദ്യാര്‍ഥിയുടെ പേരിലാണു രജിസ്റ്റര്‍ ചെയ്തിട്ടുള്ളത്. എന്നാല്‍ തനിക്ക് അമലയെ അറിയില്ലെന്നു വിദ്യാര്‍ഥി പറഞ്ഞെന്ന വിവരമാണു പുറത്തുവരുന്നത്.