അപ്രഖ്യാപിത ഹര്‍ത്താലിലെ അക്രമം;നൂറിലധികം അറസ്റ്റ്;തിരച്ചില്‍ തുടരുന്നു

മലപ്പുറം:കഴിഞ്ഞ ദിവസം മലബാര്‍ മേഖലയില്‍ അരങ്ങേറിയ അപ്രഖ്യാപിത ഹര്‍ത്താലില്‍ ആക്രമണം അഴിച്ചുവിട്ടവരെന്നു കരുതുന്ന നൂറോളം യുവാക്കളെ പൊലീസ് അറസ്റ്റു ചെയ്തു.ബാക്കിയുള്ളവര്‍ക്കായി തിരച്ചില്‍ തുടരുകയാണ്.അറസ്റ്റു ചെയ്ത കുറച്ചുപേരേ പിന്നീട് ജാമ്യത്തില്‍ വിട്ടയച്ചു.ം എന്നാല്‍ പൊലീസിന്റെ ജോലി തടസ്സപ്പെടുത്താനും പൊതുമുതല്‍ നശിപ്പിക്കാനും മുന്നില്‍ നിന്ന പതിനഞ്ചോളം പേര്‍ക്കെതിരെ ജാമ്യമില്ലാ വകുപ്പു പ്രകാരം കേസ് രജിസ്റ്റര്‍ ചെയ്തിട്ടുണ്ട്.ഇവരെ റിമാന്‍ഡ് ചെയ്തു.ഹര്‍ത്താല്‍ അനുകൂലികള്‍ സഞ്ചരിച്ച വാഹനങ്ങളും കസ്റ്റഡിയിലെടുത്തിട്ടുണ്ട്

സാമൂഹ്യമാധ്യമത്തിലൂടെയാണ് ഞായറാഴ്ച വളരെ വൈകി ഹര്‍ത്താലിന് ആഹ്വാനം ചെയ്തത്.തുടര്‍ന്ന് ഇത്രയധികം യുവാക്കള്‍ എങ്ങനെ സംഘടിച്ചെന്നും ഇതിനു പിന്നില്‍ പ്രവര്‍ത്തിച്ചവരാരെന്നും കണ്ടെത്താന്‍ നിരവധി വാട്‌സ്അപ് നമ്പറുകളുള്‍പ്പടെയുള്ളവയുടെ വിശദാംശങ്ങള്‍ പൊലീസ് തേടുന്നുണ്ട്. എടക്കര,പൊന്നാനി ,താനൂര്‍ മഞ്ചേരി എന്നിവടങ്ങളില്‍ പൊലീസുകാര്‍ക്കെതിരെ ആക്രമണം അഴിച്ചുവിട്ട കൂടുതല്‍ പേരേ കണ്ടെത്താനും അന്വേഷണം തുടങ്ങി.