ഇടതു സീറ്റുകണ്ട് ഘടകക്ഷികള്‍ പനിക്കണ്ട

  ലോക്സഭാ തിരഞ്ഞെടുപ്പിലെ സീറ്റ് വിഭജന ചര്‍ച്ചയിലേക്ക് എല്‍.ഡി.എഫ് ആര്‍ക്കൊക്കെ സീറ്റ് കിട്ടുമെന്ന ഉദ്വേഗത്തിലാണ് മുന്നണിയിലെ ഘടകകക്ഷികള്‍. കഴിഞ്ഞ തിരഞ്ഞെടുപ്പില്‍ സി.പി.എം 15 സീറ്റിലും സി.പി.ഐ നാല് സീറ്റിലും ജനതാദള്‍ എസ് ഒരു സീറ്റിലുമാണ് മത്സരിച്ചത്. നാല് കക്ഷികളെകൂടി ഉള്‍പ്പെടുത്തിയതില്‍ അവരില്‍ ആര്‍ക്കൊക്കെ സീറ്റ് കിട്ടുമെന്ന ചോദ്യമാണ് ഉയരുന്നത്. നിര്‍ണായക തിരഞ്ഞെടുപ്പായതിനാല്‍ കഴിഞ്ഞ തവണ മത്സരിച്ച സീറ്റുകളുടെ എണ്ണം കുറയ്ക്കാന്‍ സി.പി.എം തയാറാവില്ല. തങ്ങളുടെ സീറ്റ് വിട്ടുകൊടുക്കാന്‍ സി.പി.ഐയും. ജനതാദളിന് ഒരു സീറ്റ് ഇക്കുറിയും കിട്ടുമെന്ന പ്രതീക്ഷയുണ്ടെങ്കിലും കോട്ടയം സീറ്റ് വച്ചുമാറാനാവുമോ എന്ന ആലോചനയിലാണ് അവരെന്നാണ് സൂചന. തിരുവനന്തപുരം കിട്ടുമോ എന്നാണ് അവരുടെ നോട്ടം. അങ്ങനെയെങ്കില്‍ എ. നീലലോഹിത ദാസിനെ മത്സരിപ്പിക്കാനാണ് ദള്‍ ഉദ്ദേശിക്കുന്നതത്രേ. എന്നാല്‍, അത് വിട്ടുകൊടുക്കാന്‍ സി.പി.ഐ തയാറാവില്ല. അങ്ങനെയെങ്കില്‍ കോട്ടയം സീറ്റ് കൂടി സി.പി.എം ഏറ്റെടുക്കുമോ എന്നാണ് അറിയേണ്ടത്. പകരം മറ്റേതെങ്കിലും സീറ്റ് ദളിന് കൊടുക്കുമോ എന്നതും കണ്ടറിയേണ്ടതുണ്ട്. പുതുതായി മുന്നണിയില്‍ എത്തിയ കക്ഷികള്‍ക്ക് സീറ്റ് കൊടുക്കണമെങ്കില്‍ അത് സി.പി.എമ്മിന്റെ അക്കൗണ്ടില്‍ നിന്നുതന്നെ വേണ്ടിവരും. ദളിന്റെ സീറ്റ് കൂടി ഏറ്റെടുത്താല്‍ ഇക്കുറി 16 സീറ്റില്‍ സി.പി.എമ്മിന് മത്സരിക്കാനാവും. അതേസമയം, പുതിയ ഘടകകക്ഷികള്‍ മാത്രമല്ല, എന്‍.സി.പിയും സീറ്റ് ആഗ്രഹിക്കുന്നുണ്ട്. ഐ.എന്‍.എല്‍, ഫ്രാന്‍സിസ് ജോര്‍ജ്ജിന്റെ നേതൃത്വത്തിലുള്ള ജനാധിപത്യ കേരള കോണ്‍ഗ്രസും ആഗ്രഹത്തിലാണ്. രാജ്യസഭാ സീറ്റ് നല്‍കിയതിനാല്‍ എല്‍.ജെ.ഡിക്ക് ലോക്‌സഭാ സീറ്റ് നല്‍കാനിടയില്ല. എങ്കിലും വടകര, കോഴിക്കോട് സീറ്റുകളിലൊന്ന് അവര്‍ ആഗ്രഹിക്കുന്നുണ്ട്. കാസര്‍കോട് സീറ്റിലാണ് ഐ.എല്‍.എല്‍ നോട്ടം. കോട്ടയം,? പത്തനംതിട്ട സീറ്റുകളിലൊന്നിലാണ് ജനാധിപത്യ കേരള കോണ്‍ഗ്രസിന്റെ മോഹം. എന്‍.സി.പിക്കാകട്ടെ പത്തനംതിട്ടയും. ഇവര്‍രെല്ലാം ആഗ്രഹം മാറ്റിവയ്‌ക്കേണ്ടിവരുമെന്ന സൂചനയാണ് സി.പി.എം നേതാക്കള്‍ നല്‍കുന്നത്. ദളിനും സീറ്റ് കൊടുത്തില്ലെങ്കില്‍ ഫലത്തില്‍ ഇത്തവണ സി.പി.എമ്മും സി.പി.ഐയും മാത്രമായിരിക്കും മത്സരിക്കുക.