സ്വര്‍ണ്ണ കടത്ത് : ചാര്‍ട്ടേര്‍ഡ് വിമാനങ്ങള്‍ നിലച്ചേക്കും

  ചാര്‍ട്ടേര്‍ഡ് വിമാനങ്ങള്‍ക്ക് കേന്ദ്രസര്‍ക്കാര്‍ പുതിയ നിബന്ധനകളില്‍ ഏര്‍പ്പെടുത്തി. ഇതോടെ ചാര്‍ട്ടേര്‍ഡ് വിമാനങ്ങള്‍ക്കായി അപേക്ഷ സ്വീകരിക്കുന്നത് ഗള്‍ഫ് രാജ്യങ്ങളിലെ ഇന്ത്യന്‍ എംബസികള്‍ നിര്‍ത്തിവെക്കുമെന്നാണ് സൂചന. ഇതുവരെ ചാര്‍ട്ടേര്‍ഡ് വിമാന അനുമതിക്കായി കോണ്‍സുലേറ്റിനെയോ എംബസിയെയോ നേരിട്ട് സമീപിച്ചാല്‍ മതിയായിരുന്നു. അതിനുശേഷം കേന്ദ്ര വിദേശകാര്യ മന്ത്രാലയത്തിന്റെ അനുമതി വാങ്ങുന്ന രീതിയാണ് നിലവിലുള്ളത്. യാത്രക്കാരുടെ വിശദാംശങ്ങള്‍ സമര്‍പ്പിച്ചാല്‍ മൂന്ന് ദിവസത്തിനുള്ളില്‍ അനുമതി ലഭിക്കുമായിരുന്നു. ഇത് ഉപയോഗപ്പെടുത്തിയാണ് കെ.എം.സി.സി. അടക്കമുള്ള സംഘടനകള്‍ ഗള്‍ഫില്‍നിന്നും ചാര്‍ട്ടേര്‍ഡ് വിമാനങ്ങള്‍ ബുക്ക് ചെയ്തിരുന്നത്. എന്നാല്‍ അനുമതിക്കായുള്ള പെര്‍ഫോമ ഷീറ്റില്‍ സംഘടനയുടെയോ സ്ഥാപനങ്ങളുടെയോ പേരുണ്ടാകാറില്ല. അതുകൊണ്ടുതന്നെ ആര് ചാര്‍ട്ടര്‍ ചെയ്യുന്നെന്നതിനെ സംബന്ധിച്ച് സര്‍ക്കാരുകള്‍ക്ക് കൃത്യമായ ധാരണയില്ലായിരുന്നു. കഴി് ദിവസങ്ങളിലെ സ്വര്‍ണ്ണകള്ളക്കടത്ത് അടക്കമുള്ള കാര്യങ്ങള്‍ക്ക് ശേഷമാണ് ഈ നീക്കം. വിമാനത്താവളത്തിലെ കോവിഡ് പരിശോധനയില്‍ പരാജയപ്പെടുന്നവര്‍ക്ക് പകരം യാത്രക്കാരെ അനുവദിക്കില്ലെന്നും പുതിയ നിബന്ധനകളിലുണ്ട്. ജൂണ്‍ 25 മുതല്‍ കോവിഡ് സര്‍ട്ടിഫിക്കറ്റ് നിര്‍ബന്ധമാക്കും. പുതിയ ഉത്തരവ് പ്രകാരം ചാര്‍ട്ടേര്‍ഡ് വിമാനങ്ങള്‍ ഏര്‍പ്പെടുത്തുന്ന സംഘടനകളോ, സ്ഥാപനങ്ങളോ സംസ്ഥാന സര്‍ക്കാരിനെയാണ് അനുമതിക്കായി ആദ്യം സമീപിക്കേണ്ടത്. ക്വാറന്റീന്‍ ഉള്‍പ്പെടെയുള്ള സൗകര്യങ്ങള്‍ പരിഗണിച്ച് സംസ്ഥാനങ്ങള്‍ക്ക് ഇക്കാര്യത്തില്‍ തീരുമാനമെടുക്കാം. സംസ്ഥാന സര്‍ക്കാരിന്റെ അനുമതിക്കുശേഷമാണ് വിദേശകാര്യമന്ത്രാലയത്തെ സമീപിക്കേണ്ടത്. സംസ്ഥാന അനുമതി ലഭിച്ച ചാര്‍ട്ടേര്‍ഡ് വിമാനത്തിന് ബന്ധപ്പെട്ട രാജ്യങ്ങളുടെ ക്ലിയറന്‍സ് കിട്ടാന്‍ എംബസികളെയും കോണ്‍സുലേറ്റുകളെയും സമീപിക്കാം. യാത്രക്കാരുടെ പൂര്‍ണവിവരങ്ങള്‍ സംസ്ഥാനങ്ങള്‍ക്കും നയതന്ത്ര കാര്യാലയങ്ങള്‍ക്കും മുന്‍കൂട്ടി കൈമാറണം. യാത്രക്കാരുടെ പേരുകളില്‍ മാറ്റങ്ങള്‍ വരുത്താന്‍ പാടില്ല. തീരുമാനം എപ്പോള്‍ മുതല്‍ പ്രാബല്യത്തില്‍ വരുമെന്ന് ഇതുവരെ വ്യക്തമാക്കിയിട്ടില്ല.