ഡി കെ മുരളി എംഎൽഎയുടെ മകനു നേരെയും ഡിവൈഎഫ്ഐ സംസ്ഥാന സെക്രട്ടറി എ എ റഹീമിനെതിരെയും വ്യാജ പ്രചരണമാണ് നടത്തുന്നത്. ഡിവൈഎഫ്ഐയിൽ മിഥിലാജ് എത്തിയിട്ട് ഒരു വർഷമായി. ഈ ഒരു വർഷത്തിനിടെ ഒരു കേസും മിഥിലാജിനെതിരെ ഇല്ലെന്നും ആനാവൂർ പറഞ്ഞു. തിരുവോണത്തലേന്ന് രണ്ടു ഡിവൈഎഫ്ഐ പ്രവർത്തകർ കൊല്ലപ്പെട്ട സംഭവത്തിൽ ഒന്നാം പ്രതി ഷജിത്തിനൊപ്പം കൃത്യത്തിൽ നേരിട്ടു പങ്കെടുത്തുവെന്നു കരുതുന്ന ഉണ്ണി, അൻസാർ എന്നിവർക്കായി പൊലീസ് വ്യാപകമായി തിരച്ചിൽ ആരംഭിച്ചതായി വെഞ്ഞാറമൂട് സിഐ വിജയരാഘവൻ അറിയിച്ചു. ഇവർക്കു പുറമേ സജീബ്, സനൽ എന്നിവർക്കും കൃത്യത്തിൽ നേരിട്ടു ബന്ധമുണ്ടെന്നും മറ്റുള്ളവർ സഹായികളാണെന്നുമാണു കരുതുന്നത്. ആകെ 7 പേരാണ് അറസ്റ്റിലായത്. പ്രതികൾക്കായി മൊബൈൽ ടവർ ലൊക്കേഷൻ കേന്ദ്രീകരിച്ചു നടത്തിയ അന്വേഷണം ഫലം കണ്ടില്ലെന്നാണു വിവരം. കൊല്ലപ്പെട്ട ഹഖ് മുഹമ്മദ്, മിഥിലാജ് എന്നിവർക്കൊപ്പം ഉണ്ടായിരുന്ന ഡിവൈഎഫ്ഐ പ്രവർത്തകരുടെ സംഘത്തിൽ നിന്നു പൊലീസ് വിവരശേഖരണം ആരംഭിച്ചു. 2 മാസം മുൻപു ഡിവൈഎഫ്ഐ പ്രവർത്തകനു വെട്ടേറ്റ സംഭവത്തിലെ പ്രതികളാണ് ഇപ്പോൾ അറസ്റ്റിലായ ഷജിത്തും അജിത്തും. ഇവർ ജാമ്യത്തിൽ ഇറങ്ങിയതു മുതൽ ആക്രമണ ഭീഷണി ഉണ്ടായിരുന്നുവത്രേ. സംഭവത്തിനു 3 ദിവസം മുൻപ് രാത്രി അജിത്തിന്റെ ഓട്ടോയിൽ ഷജിത് പോകുമ്പോൾ ആരോ പിന്തുടർന്നെത്തി വെട്ടാൻ ശ്രമിച്ചു. ഓട്ടോയുടെ പിൻഭാഗത്താണു വെട്ടു കൊണ്ടത്. ഇതിനു പിന്നിൽ മുഹമ്മദ് ഹഖിന്റെ സംഘമാണെന്ന സംശയമാണു പ്രത്യാക്രമണത്തിലേക്കു നയിച്ചതെന്നു പൊലീസ് കരുതുന്നു. സംഭവദിവസം ഉച്ചയ്ക്കാണ് ഇതിനായുള്ള പദ്ധതി തയാറാക്കിയത്. അക്രമം നടക്കുമ്പോൾ ഇരു സംഘങ്ങളുടെ കയ്യിലും ആയുധമുണ്ടായിരുന്നോ എന്നതും പൊലീസ് അന്വേഷിക്കുന്നുണ്ട്. അതേസമയം, കേസിൽ ഉന്നതതല ഗൂഢാലോചനയല്ല പ്രാദേശിക ഗൂഢാലോചനയാണ് അന്വേഷിക്കുന്നതെന്ന് ഉന്നത ഉദ്യോഗസ്ഥൻ വ്യക്തമാക്കി. കഴിഞ്ഞ ദിവസം അറസ്റ്റിലായ സജീബ് (35), സനൽ (32), സനലിന്റെ സഹോദരി പ്രീജ (30) എന്നിവരെ ഇന്നലെ കോടതി റിമാൻഡ് ചെയ്തു.