ടൈറ്റാനിയം കേസ് ഒതുക്കാന്‍, ബിജെപി നേതാവ്

യു ഡി എഫ് നേതാക്കള്‍ പ്രതിയായ കോടികളുടെ അഴിമതി നടത്തിയ ടൈറ്റാനിയം കേസ് സി ബി ഐ ഏറ്റെടുക്കാതിരിക്കാന്‍ ബിജെപി ഇടപെടല്‍. മുന്‍മുഖ്യമന്ത്രി ഉമ്മന്‍ചാണ്ടി, പ്രതിപക്ഷ നേതാവ് രമേശ് ചെന്നിത്തല, മുന്‍വ്യവസായമന്ത്രി വി കെ ഇബ്രാഹിം കുഞ്ഞ് എന്നിവര്‍ പ്രതികളായ കേസിലാണ് ദുരൂഹമായ ഇടപാട്. കേരളത്തില്‍ നിന്നുള്ള ഉന്നത ബിജെപി നേതാവ് ആഭ്യന്തരമന്ത്രാലയത്തില്‍ നേരിട്ട് ഇടപെട്ട് നടപടി മരവിപ്പിച്ചതായാണ് സൂചന.ഇദ്ദേഹവും കേസില്‍ പ്രതിസ്ഥാനത്തുള്ള യുഡിഎഫ് നേതാവും തമ്മിലാണ് ധാരണ. കേസ് സിബിഐയെക്കൊണ്ട് ഏറ്റെടുപ്പിക്കാതിരിക്കാനാണ് നീക്കം. സിബിഐ മറിച്ചൊരു നിലപാടിലേക്ക് വന്നാല്‍ നിയമസഭാ തെരഞ്ഞെടുപ്പ് വരെ നീട്ടിക്കൊണ്ടുപോവുകയാണ് ലക്ഷ്യം. നിയമസഭാ തെരഞ്ഞെടുപ്പിലടക്കം രഹസ്യകൂട്ടുക്കെട്ട് ഉണ്ടാക്കാനും ടൈറ്റാനിയം കേസ് ഉപയോഗിക്കുകയാണ് ബിജെപി. സ്വര്‍ണക്കടത്ത് അടക്കം പലതിലും നിരന്തരം സിബിഐ അന്വേഷണം ആവശ്യപ്പെടുന്ന ബിജെപി സംസ്ഥാന പ്രസിഡന്റ് കെ സുരേന്ദ്രന്‍ എന്നിവര്‍ കഴിഞ്ഞ ഒരു വര്‍ഷമായി മടക്കിക്കെട്ടി വച്ചിരിക്കുന്ന ടൈറ്റാനിയം അഴിമതി കേസിനെ കുറിച്ച് മിണ്ടാത്തതും ശ്രദ്ധേയമാണ്. വിദേശ കമ്പനികള്‍ക്കുകൂടി പങ്കുള്ള ഇടപാടില്‍ രാജ്യാന്തരതലത്തില്‍ അന്വേഷണം വേണമെന്ന ശുപാര്‍ശയെ തുടര്‍ന്നാണ് 2019 സെപ്തംബര്‍ മൂന്നിന് സംസ്ഥാന സര്‍ക്കാര്‍ കേസ് സിബിഐയ്ക്ക് വിട്ടത്. 13 വര്‍ഷം വിജിലന്‍സ് നടത്തിയ അന്വേഷണ റിപ്പോര്‍ട്ടും സാക്ഷി മൊഴിയും അനുബന്ധ ഫയലുകളും വിജിലന്‍സ് ഉദ്യോഗസ്ഥര്‍ സിബിഐ ആസ്ഥാനത്ത് എത്തി കൈമാറിയിരുന്നു. എന്നിട്ടും ഇതുവരെ നടപടി വിവരം സിബിഐ സംസ്ഥാനസര്‍ക്കാരിനെ അറിയിച്ചിട്ടില്ല. പൊതുമേഖലാ സ്ഥാപനമായ ട്രാവന്‍കൂര്‍ ടൈറ്റാനിയത്തില്‍ 256 കോടി രൂപ ചെലവില്‍ മാലിന്യനിര്‍മാര്‍ജന പ്ലാന്റ് സ്ഥാപിക്കുന്നതിന് യന്ത്രങ്ങള്‍ ഇറക്കുമതി ചെയ്തതില്‍ 68 കോടി രൂപയുടെ അഴിമതി നടത്തിയെന്നാണ് വിജിലന്‍സ് കേസ്. 2005--06 കാലഘട്ടത്തില്‍ ഉമ്മന്‍ചാണ്ടി മുഖ്യമന്ത്രി ആയിരിക്കെയാണ് പ്ലാന്റ് സ്ഥാപിക്കുന്നതിന് യന്ത്രങ്ങള്‍ ഇറക്കുമതി ചെയ്തത്.