യു.എ.ഇയില്‍ പാര്‍പ്പിട സമുച്ചയത്തില്‍ വന്‍ തീപിടുത്തം

അജ്മന്‍: യു.എ.ഇയിലെ അജ്മനിലുള്ള പാര്‍പ്പിട സമുച്ചയത്തില്‍ വന്‍ തീപിടുത്തം. അജ്മനിലെ അല്‍ സവന്‍ എന്ന കെട്ടിടത്തിനാണ് തീ പിടുത്തം ഉണ്ടായത്. ആളപായമില്ലെന്നാണ് വിവരങ്ങള്‍. നിരവധിയാളുകള്‍ക്ക് പരുക്കേറ്റിട്ടുണ്ട്. ടവറില്‍ നിന്ന് വന്‍ തോതില്‍ തീയും പുകയും ഉയരുന്നുണ്ട്. പന്ത്രണ്ടോളം കെട്ടിടങ്ങളിലായി മൂവായിരത്തിലധികം പാര്‍പ്പിടങ്ങളുള്ള ഉള്‍പ്പെടുന്നതാണ് അല്‍ സാവന്‍. കെട്ടിടങ്ങളില്‍ നിന്ന് ആളുകളെയെല്ലാം പുറത്തെത്തിച്ചിട്ടുണ്ട്. പുക ശ്വസിച്ചതുമൂലം പലര്‍ക്കും ശ്വാസസംബന്ധമായ പ്രശ്‌നങ്ങള്‍ ഉണ്ടായിട്ടുണ്ട്. ഫ്‌ളാറ്റുകള്‍ പൂര്‍ണമായും കത്തി നശിക്കുകയായിരുന്നു. രാത്രി 8.30 ഓടെ ആയിരുന്നു തീപിടുത്തം. ആറാം ബ്ലോക്കില്‍ നിന്ന് തീ പടരുകയായിരുന്നുവെന്നാണ് വിവരങ്ങള്‍. തീ പിടുത്തത്തിനുള്ള കാരണം വ്യക്തമല്ല. ശക്തമായ കാറ്റ് ഉണ്ടായിരുന്നതിനാല്‍ തീ അതിവേഗം പടര്‍ന്നുപിടിച്ചു. തീ നിയന്ത്രണ വിധേയമാക്കിയിട്ടുണ്ട്. യു.എ.ഇ ആഭ്യന്തര മന്ത്രി ഷെയ്ഖ് സയിഫ് ബിന്‍ സയിദ് സ്ഥലം സന്ദര്‍ശിച്ചു. സംഭവത്തെക്കുറിച്ച് പോലീസ് അന്വേഷണം ആരംഭിച്ചു.