വായ്പ തിരിച്ചടച്ചില്ല;ഗർഭിണിയായ യുവതിയുടെ ശരീരത്തിൽ ട്രാക്ടർ കയറ്റിയിറക്കി കൊലപ്പെടുത്തി

റാഞ്ചി: മൂന്ന് മാസം ഗര്‍ഭിണിയായ യുവതിയെ ട്രാക്ടര്‍ കയറ്റി ഇറക്കി കൊലപ്പെടുത്തി സ്വകാര്യ പണമിടപാട് സ്ഥാപനത്തിന്റെ ക്രൂരത. ജാര്‍ഖണ്ഡിലെ ഹസാരിബാഗ് ജില്ലയിലാണ് ക്രൂരമായ സംഭവം അരങ്ങേറിയത്. ജില്ലയിലെ ഇഷാക് പോലീസ് സ്റ്റേഷന്‍ പരിധിയില്‍ വ്യാഴാഴ്ചയാണ് സംഭവം. ഭിന്നശേഷിക്കാരനായ കര്‍ഷകന്‍ സ്വകാര്യ സ്ഥാപനത്തില്‍ നിന്ന് ട്രാക്ടര്‍ വാങ്ങുന്നതിനായി ലോണ്‍ എടുത്തിരുന്നു. ഇതിന്റെ തിരിച്ചടവ് മുടങ്ങിയതുമായി ബന്ധപ്പെട്ട് വാഹനം കണ്ടുകെട്ടാന്‍ എത്തിയതായിരുന്നു പണമിടപാട് സ്ഥാപനത്തിന്റെ പ്രതിനിധി. കര്‍ഷകന്റെ ഗര്‍ഭിണിയായ മകളും ജീവനക്കാരും തമ്മില്‍ തര്‍ക്കമുണ്ടാകുകയും തുടര്‍ന്ന് ട്രാക്ടറുപയോഗിച്ച് ഇടിച്ച് വീഴ്ത്തി കൊലപ്പെടുത്തുകയുമായിരുന്നു. യുവതിയെ ഉടനെ ആശുപത്രിയിലെത്തിച്ചെങ്കിലും അപ്പോഴേക്കും മരണം സംഭവിച്ചിരുന്നു. വാഹനം തിരിച്ചു പിടിക്കാന്‍ എത്തുന്ന കാര്യം പണമിടപാട് സ്ഥാപനത്തിലെ ജീവനക്കാര്‍ പോലീസില്‍ അറിയിച്ചിരുന്നില്ലെന്നാണ് പോലീസും പറയുന്നത്. സംഭത്തിന്റെ എല്ലാ വശങ്ങളും പരിശോധിച്ച് ഉചിതമായ നടപടി സ്വീകരിക്കുമെന്നും കേസന്വേഷണവുമായി സഹകരിക്കുമെന്നും കമ്പനി അധികൃതര്‍ വ്യക്തമാക്കി. യുവതിയും പണമിടപാട് സ്ഥാപനത്തിലെ ജീവനക്കാരും തമ്മില്‍ വാക്കേറ്റമുണ്ടായതായി ജില്ലാ പോലീസ് മേധാവി മനോജ് രത്തന്‍ പ്രതികരിച്ചു. തര്‍ക്കത്തെ തുടര്‍ന്നാണ് കൊലപാതകം നടന്നതെന്നാണ് മനസ്സിലാക്കുന്നതെന്നും ജില്ലാ പോലീസ് മേധാവി പറഞ്ഞു.