മാരുതി സുസുക്കി മനേജരുടെ മരണം : 31 പേര്‍ കുറ്റക്കാര്‍

ഹരിയാനയിലെ മാരുതി സുസുക്കി ഫാക്ടറിയില്‍ മനേജരുടെ മരണത്തിന് ഇടയാക്കിയ കേസില്‍ 31 തൊഴിലാളികള്‍ കുറ്റക്കാരെന്ന് കോടതി കണ്ടെത്തി. 117 പേരെ വെറുതെ വിട്ടു. ഹരിയാനയിലെ ഗുരുഗോന്‍ കോടതിയാണ് കേസില്‍ 31 പേര്‍ കുറ്റക്കാരെന്ന് കണ്ടെത്തിയത്.

2012 ല്‍ തൊഴിലാളികളും മാനേജ്‌മെന്റ് പ്രതിനിധികളും തമ്മിലുണ്ടായ സംഘര്‍ഷത്തെ തുടര്‍ന്നാണ് എച്ച്ആര്‍ ജനറല്‍ മാനേജരായിരുന്ന അവാനിഷ് കുമാര്‍ ദേവ് എന്നയാള്‍ വെന്തുമരിച്ചത്. സംഘര്‍ഷത്തില്‍ കൈക്കും കാലിനും ഗുരുതരമായി പരിക്കേറ്റ അവാനിഷ് കുമാര്‍ തൊഴിലാളികള്‍ തീവെച്ച കോണ്‍ഫറന്‍സ് റൂമില്‍ അകപ്പെടുകയായിരുന്നു. സംഭവത്തില്‍ ഒന്‍പത് പോലീസുകാരും മാനേജര്‍മാരും സൂപ്പര്‍വൈസറും ഉള്‍പ്പെടെ നൂറോളം പേര്‍ക്ക് പരിക്കേറ്റിരുന്നു. കേസില്‍ 148 തൊഴിലാളികളാണ് പ്രതിചേര്‍ക്കപ്പെട്ടിരുന്നത്. ഇതില്‍ 117 പേരെ കോടതി കുറ്റവിമുക്തരാക്കുകായിരുന്നു.