മിഷേല്‍ ഷാജി ആത്മഹത്യ ചെയ്തതാണെന്ന പോലീസ് സ്ഥിരീകരണം തള്ളി കുടുംബം

സിഎ വിദ്യാര്‍ത്ഥിനി മിഷേല്‍ ഷാജി ആത്മഹത്യ ചെയ്തതാണെന്ന പോലീസ് സ്ഥിരീകരണം തള്ളി കുടുംബം. കുടുംബാംഗങ്ങള്‍ ഇന്ന് അന്വേഷണ സംഘത്തെ കാണും. സംഭവത്തില്‍ ആത്മഹത്യയെങ്കില്‍ കാരണവും പോലീസ് വ്യക്തമാക്കണമെന്ന് പിതാവ് ഷാജി പറഞ്ഞു.

സംഭവത്തിന് തൊട്ടു മുമ്പ് വരെ മിഷേല്‍ കുടുംബാംഗങ്ങളുമായി സംസാരിച്ചിരുന്നു. കലൂര്‍ പള്ളിയില്‍ നിന്നും ഇറങ്ങിയ ശേഷം മകള്‍ക്ക് എന്തു സംഭവിച്ചെന്ന് അറിയില്ലെന്നും പറഞ്ഞു. അതുപോലെ തന്നെ സംഭവത്തില്‍ പോലീസ് അറസ്റ്റ് ചെയ്ത പിറവം സ്വദേശി ക്രോണിന്‍ അലക്‌സാണ്ടര്‍ ബേബിയെക്കുറിച്ച് അറിയില്ലെന്നാണ് മിഷേലിന്റെ കുടുംബം പറയുന്നത്. ക്രോണിനെക്കുറിച്ച് മകള്‍ ഒരു പരാതിയും പറഞ്ഞിട്ടില്ല. എന്നാല്‍ ക്രോണിനെതിരേ മിഷേലിന്റെ സഹപാഠിയുടെ മൊഴി പോലീസ് എടുത്തിട്ടുണ്ട്. ഓണ്‍ലൈന്‍ വഴിയായിരുന്നു മൊഴിയെടുക്കല്‍. സംഭവത്തിലെ ദുരൂഹതകള്‍ പരിഹരിക്കണമെന്ന് ആവശ്യപ്പെട്ട് ഇന്ന് ആക്ഷന്‍ കൗണ്‍സില്‍ പിറവത്ത് ഹര്‍ത്താല്‍ ആചരിക്കുകയാണ്.