കൂട്ടമാനഭംഗകേസില്‍ പ്രതിയായ യുപി മുന്‍മന്ത്രിയെ അറസ്റ്റ് ചെയ്തു

കൂട്ടമാനഭംഗകേസില്‍ പ്രതിയായ ഉത്തര്‍പ്രദേശ് മുന്‍മന്ത്രിയും സമാജ്‌വാദി പാര്‍ട്ടി നേതാവുമായ ഗായത്രി പ്രജാപതിയെ പൊലീസ് അറസ്റ്റ് ചെയ്തു.2014ലാണ് കേസിനാസ്പതമായ സംഭവം. അമ്മയേയും അവരുടെ പ്രായപൂര്‍ത്തിയാകാത്ത മകളേയും മാനഭംഗപ്പെടുത്തിയ കേസിലാണ് പ്രജാപതിയെ അറസ്റ്റ് ചെയ്തത്. ഒളിവിലായിരുന്ന പ്രജാപതിയെ ലക്‌നൗവില്‍ നിന്നുമാണ് പിടികൂടിയത്. ഇതേ കേസില്‍ രണ്ട് പേരെ നോയിഡയില്‍ നിന്നും പ്രത്യേക അന്വേഷണ സംഖം അറസ്റ്റ് ചെയ്തിരുന്നു. 17 ദിവസമായി ഇയാള്‍ ഒളിവിലായിരുന്നു.

മാനഭംഗകേസില്‍ നിന്നും ഒഴിവാക്കണമെന്നാവശ്യപ്പെട്ട്‌ സുപ്രീം കോടതിയില്‍ സമര്‍പ്പിച്ച ഹര്‍ജി തള്ളിയിരുന്നു. തുടര്‍ന്ന് ഇയാള്‍ക്കെതിരെ ജാമ്യമില്ലാ വാറന്‍ഡ് പുറപ്പെടുവിക്കുകയായിരുന്നു. നാല് ആഴ്ചകള്‍ക്ക് മുന്‍പ് ഇയാളുടെ പാസ്‌പോര്‍ട്ടും പിന്‍വലിച്ചിരുന്നു.

കഴിഞ്ഞ ദിവസം ഇയാളുടെ സഹായിയെ അറസ്റ്റ് ചെയ്തിരുന്നു. ഏഴ് പ്രതികളാണ് കേസിലുള്ളത്. എസ്പിയുടെ സ്ഥാനാര്‍ത്ഥിയായി അമേഠിയില്‍ നിന്ന് മത്സരിച്ചെങ്കിലും തോറ്റു. ഇതേത്തുടര്‍ന്ന് അഖിലേഷ് മന്ത്രിസഭയില്‍ നിന്നും ഇയാളെ പുറത്താക്കിയിരുന്നു. ഇത് ബിജെപി തെരഞ്ഞെടുപ്പില്‍ വിഷയമാക്കുകയും ചെയ്തിരുന്നു.