2000 കോടി മയക്കുമരുന്ന് : മമതാ കുല്‍ക്കര്‍ണ്ണിക്കും കാമുകനും എതിരേ ജാമ്യമില്ലാ അറസ്റ്റ് വാറന്റ്

2000 കോടി മയക്കുമരുന്നു കേസില്‍ മുന്‍ ബോളിവുഡ് സുന്ദരി മമതാ കുല്‍ക്കര്‍ണ്ണിക്കും കാമുകന്‍ വിക്കി ഗോസ്വാമിക്കും എതിരേ ജാമ്യമില്ലാ അറസ്റ്റ് വാറന്റ് പുറപ്പെടുവിച്ചു. താനെയില്‍ പ്രത്യേക കോടതിയാണ് തിങ്കളാഴ്ച ഇരുവര്‍ക്കുമെതിരേ വാറന്റ് പുറപ്പെടുവിച്ചത്.

ഇവര്‍ക്കെതിരേ ശക്തമായ തെളിവുകളുടെ അടിസ്ഥാനത്തിലാണ് കുറ്റപത്രം സമര്‍പ്പിച്ചിട്ടുള്ളത്. നേരത്തേ പ്രതിപട്ടികയില്‍ നിന്നും രണ്ടുപേരെയും ഒഴിവാക്കിയതായിരുന്നു. പിന്നീട് തെളിവുകള്‍ കിട്ടുകയായിരുന്നു. മയക്കുമരുന്ന് റാക്കറ്റുമായി ഇവര്‍ക്ക് ഉറ്റ ബന്ധമുണ്ടെന്നതിന് ശക്തമായ തെളിവുകള്‍ ഉണ്ടെന്ന് കോടതിയില്‍ പബ്‌ളിക്ക് പ്രോസിക്യൂട്ടര്‍ ശിശിര്‍ ഹിരേ വ്യക്തമാക്കി. ഇന്ത്യയില്‍ നിന്നും കെനിയയിലേക്ക് മെതാംഫെറ്റാമിന്‍ ഉള്‍പ്പെടെയുള്ള മയക്കുമരുന്ന് കടത്തുന്ന സംഘം നടത്തുന്ന പ്രധാനികളും മമതാ കുല്‍ക്കര്‍ണിയും ഗോസ്വാമിയുമാണെന്നാണ് വിചാരണവേളയില്‍ പറഞ്ഞത്.