‘തീവ്രവാദികളെ തന്നാല്‍ പച്ചയ്ക്ക് തിന്നും’ : ഫിലിപ്പീന്‍സ് പ്രസിഡന്റ്

വിവാദ പ്രസ്താവനകളുമായി ഫിലിപ്പീന്‍സ് പ്രസിഡന്റ് റൊഡ്രിഗോ ദുതേര്‍തെ വീണ്ടും. 'തീവ്രവാദികളെ പിടിച്ചു തന്നാല്‍ അവരെ ജീവനോടെ പച്ചയ്ക്ക് തിന്നും' എന്ന ദുതേര്‍തെയുടെ വാക്കുകളാണ് ഇപ്പോള്‍ വിവാദമായിരിക്കുന്നത്. അല്‍പ്പം ഉപ്പും വിനാഗിരിയും തന്നാല്‍ തീവ്രവാദികളുടെ കരള്‍ പച്ചയ്ക്ക് തിന്നുമെന്ന് പറഞ്ഞ ദുതേര്‍തെ, തന്റെ പ്രസംഗം കേട്ട് ചിരിച്ച ശ്രോതാക്കളോട് തന്നെ ദേഷ്യം പിടിപ്പിച്ചാല്‍ ഈ പറഞ്ഞ കാര്യങ്ങള്‍ ഇപ്പോള്‍ ചെയ്തു കാണിക്കുമെന്നും ഭീഷണി മുഴക്കി.'താന്‍ തീവ്രവാദികളെക്കാള്‍ 50 മടങ്ങ് ക്രൂരനാണ്' എന്നു പറഞ്ഞ് തുടങ്ങിയിട്ടുള്ള പ്രസംഗത്തില്‍ ഉടനീളം വിവാദ പരാമര്‍ശങ്ങളാണ് ദുതേര്‍തെ നടത്തിയിട്ടുള്ളത്.