രാംദേവിന് എട്ടിന്റെ പണി ; പതജ്ഞലി ഭക്ഷ്യയോഗ്യമല്ല

പതഞ്ജലി എന്നാല്‍ ഇന്ത്യയിലെ ഏറ്റവും വലിയ കുത്തകയായി മാറിക്കൊണ്ടിരിക്കുകയാണ്. വിദേശസ്ഥാപനങ്ങള്‍ ഇന്ത്യക്കാരെ ഭക്ഷണത്തില്‍ മായം ചേര്‍ത്ത് നശിപ്പിക്കാന്‍ ശ്രമിക്കുന്നുവെന്ന് ഉള്‍പ്പെടെ പ്രചരിപ്പിച്ചാണ് ഉല്‍പ്പന്നങ്ങള്‍ ജനകീയമായതും. മാഗിയുടെ വീഴ്ചയില്‍ പിടിച്ച് കയറിയ രാംദേവിന്റെ കമ്പനിക്ക് ഇപ്പോള്‍ ലഭിച്ചിരിക്കുന്നത് എട്ടിന്റെ പണിയാണ്. മായം ചേര്‍ത്തെന്ന് കണ്ടെത്തിയതിനാല്‍ പതഞ്ജലിയുടെ നെല്ലിക്കാ ജ്യൂസ് നിരോധിക്കാന്‍ തീരുമാനിച്ചത് സൈനിക ക്യാന്റീനുകളിലാണ്.

ഇന്ത്യന്‍ പ്രതിരോധവകുപ്പിന്റെ സൈനികക്യാന്റിനുകളിലെ വിതരണ വിഭാഗമായ ക്യാന്റീന്‍ സ്‌റ്റോര്‍ ഡിപ്പാര്‍ട്ട്‌മെന്റ് (സിഎസ്ഡി) ആണ് പതഞ്ജലി നെല്ലിക്കാ ജ്യൂസിന്റെ വില്‍പ്പന നിര്‍ത്തിവെച്ചത്. കൊല്‍ക്കത്തയിലെ സെന്‍ട്രല്‍ ഫുഡ് ലാബ് ജ്യൂസ് ഉപയോഗിക്കാന്‍ പാടില്ലെന്ന് പരിശോധനാ റിപ്പോര്‍ട്ട് സമര്‍പ്പിച്ചതിനെ തുടര്‍ന്നാണ് നടപടി. ഭക്ഷ്യയോഗ്യമല്ലെന്നാണ് കണ്ടെത്തല്‍. ഏപ്രില്‍ മൂന്നിന് രാജ്യത്താകെയുള്ള ആര്‍മി ക്യാന്റീനുകളില്‍ ബാക്കിയുള്ള നെല്ലിക്കാ ജ്യൂസിന്റെ വിശദാംശങ്ങള്‍ അറിയിക്കാന്‍ നിര്‍ദേശിച്ചുകൊണ്ട് സിഎസ്ഡി കത്തയച്ചു.