ഭൂമി തന്നെ ഇല്ലാതാക്കാന്‍ ശേഷിയുള്ള 50 ലക്ഷം അണുബോംബുകള്‍ ഉണ്ടെന്ന് ഉത്തരകൊറിയ

അമേരിക്കയേയും ദക്ഷിണ കൊറിയയേയും മാത്രമല്ല ഭൂമി മുഴുവന്‍ ഇല്ലാതാക്കന്‍ തക്ക പ്രഹരശേഷിയുള്ള 50 ലക്ഷം അണുബോംബുകള്‍ തങ്ങളുടെ കൈവശം ഉണ്ടെന്ന് ഉത്തരകൊറിയ. അമേരിക്കയെയും കൊറിയയെയും തുടച്ചു നീക്കാന്‍ കിംഗ് ജോംങ്‌ ഉന്നിന്റെ പടയാളികള്‍ തയ്യാറായി ഇരിക്കുകയാണെന്നും ഉന്നിന്റെ അനുയായികള്‍ മുന്നറിയിപ്പ് നല്‍കുന്നു. അമേരിക്കയുടെ സഹായത്തോടെ സ്വന്തം മണ്ണില്‍ അതിശക്തമായ റോക്കറ്റ് സംവിധാനം നിര്‍മ്മിക്കാന്‍ പോകുന്നതായി ദക്ഷിണകൊറിയ മുന്നറിയിപ്പ് നല്‍കിയതിന് പിന്നാലെയാണ് ഉത്തര കൊറിയയും ഭീഷണിയുമായി എത്തിയത്.

ദയാരഹിതമായ ഒരു യുദ്ധത്തിന് യുവാക്കള്‍ തയ്യാറാണെന്നും ഇവര്‍ ഒരു വലിയ ആണവദുരന്തം സൃഷ്ടിക്കുമെന്ന് വടക്കന്‍ കൊറിയന്‍ ന്യൂസ് ഏജന്‍സിയും റിപ്പോര്‍ട്ട് ചെയ്തിട്ടുണ്ട്. ചൊവ്വാഴ്ച റോക്കറ്റുകളും ടോര്‍പ്പിഡോകളും മറ്റുമായി ശത്രുക്കളുടെ യുദ്ധക്കപ്പലിന് മുന്നില്‍ സൈനികാഭ്യാസം നടത്തിയിരുന്നു. കിഴക്കന്‍ തീരദേശ നഗരമായ വോണ്‍സാനില്‍ നൂറു കണക്കിന് ടാങ്കുകളും മറ്റുമായി 85 വര്‍ഷം പഴക്കമുളള തങ്ങളുടെ സൈന്യത്തിന്റെ കരുത്ത് പ്രദര്‍ശിപ്പിച്ചിരുന്നു. സൈനികാഭ്യാസം തുടങ്ങുന്നതിന് മുമ്പ് കിംഗ് സൈന്യത്തിന്റെ സല്യൂട്ട് സ്വീകരിച്ചിരുന്നു. അന്തര്‍വാഹിനി ഉള്‍പ്പെടെ 300 ലധികം കൂറ്റന്‍ ആയുധങ്ങളാണ് വെടിവെയ്പ്പ് നടത്തിയത്.

അതേസമയം ഇതിന് മറുപടിയായി വ്യാഴാഴ്ച ദക്ഷിണ കൊറിയ അമേരിക്കയുമായി ചേര്‍ന്ന് വടക്കന്‍ അതിര്‍ത്തിയായ പോച്ചിയോണില്‍ സൈനികാഭ്യാസം നടത്തുന്നുണ്ട്. തങ്ങളുടെ തന്ത്രപ്രധാന മേഖലകളില്‍ അമേരിക്കയുടെ മിസൈല്‍ പ്രതിരോധ സംവിധാനം ഉപയോഗിക്കുന്നുണ്ടെന്നും ദക്ഷിണ കൊറിയ പറയുന്നു.