ഊരിപ്പിടിച്ച കത്തിക്കു മുന്നിലൂടെ നടന്നെന്ന് പൊങ്ങച്ചം പറഞ്ഞു നടന്നിട്ടു കാര്യമില്ല,കയ്യേറ്റങ്ങള്‍ ഒഴിപ്പിക്കാനും സര്‍ക്കാര്‍ ധീരത കാട്ടണമെന്ന് നടന്‍ ജോയ് മാത്യു

ഊരിപ്പിടിച്ച കത്തിക്കു മുന്നിലൂടെ നടന്നവര്‍ മൂന്നാറിലെ കയ്യേറ്റങ്ങളും ഒഴിപ്പിക്കാന്‍ ധീരത കാണിക്കണമെന്ന് നടന്‍ ജോയ് മാത്യു.അല്ലാതെ കത്തിക്കു മുന്നിലൂടെ നടന്നു എന്ന് പൊങ്ങച്ചം പറഞ്ഞ് നടന്നിട്ട് കാര്യമില്ലെന്ന് അദ്ദേഹം പറഞ്ഞു.മൂന്നാര്‍ കയ്യേറ്റം ഒഴിപ്പിക്കാനുള്ള സര്‍ക്കാര്‍ നടപടിക്കു പിന്തുണയുമായി യുവകലാസാഹിതി നടത്തിയ സാംസ്‌ക്കാരിക കൂട്ടായ്മയില്‍ സംസാരിക്കുകയായിരുന്നു അദ്ദേഹം.

മകന്‍ നഷ്ടപ്പെട്ട അമ്മയുടെ വേദന മനസിലാക്കാത്തവര്‍ക്ക് കുരിശു കണ്ടപ്പോള്‍ ഹാലിളകയത് ഭീരുത്വമാണ്.തിരഞ്ഞെടുപ്പ് നടക്കുമ്പോള്‍ കുമ്പസാരക്കൂടിനു മുന്നില്‍ കുമ്പിട്ടു നില്‍ക്കുന്നവരാണിവര്‍.സംസ്‌ക്കാര ശൂന്യരായ ഭരണകര്‍ത്താക്കളാണ് ഇന്നുള്ളത്. ജനങ്ങള്‍ക്കു വേണ്ടി പണിയെടുക്കുന്ന ഉദ്യോഗസ്ഥരെ സര്‍ക്കാര്‍ പിന്തുണയ്ക്കണം.വന്‍കിടക്കാര്‍ക്കെതിരെ സര്‍ക്കാരിന് ഒന്നും ചെയ്യാന്‍ കഴിയുന്നില്ല.കരം കൊടുക്കന്നവന് സര്‍ക്കാരിനെ വിമര്‍ശിക്കാനും അവകാശമുണ്ടെന്നും അദ്ദേഹം കൂട്ടിച്ചേര്‍ത്തു.